پوليگون اۋماعىندا 1949-1965، سونداي-اق 1966-1990 جىلدار ارالىعىندا ءومىر سۇرگەن ازاماتتار eGov.kz پورتالىندا جاڭا قىزمەتتىڭ كومەگىمەن مەملەكەتتەن تولەم الا الادى.
مەملەكەتتىك قىزمەتتى كورسەتۋ ناتيجەسى 20 جۇمىس كۇنى ىشىندە دايىن بولادى، دەپ حابارلايدى Almaty-akshamy.kz.
مەملەكەتتىك قىزمەتتىڭ كومەگىمەن ازاماتتارعا جەڭىلدىكتەر مەن وتەماقىلارعا قۇقىعىن راستايتىن كۋالىك الۋ مۇمكىندىگى بەرىلەدى. جاڭا قىزمەت eGov.kz پورتالىندا تەگىن كورسەتىلەدى جانە 2022 جىلدان باستاپ قولجەتىمدى. قىزمەت ىسكە قوسىلعاننان بەرى 311 ازامات ونلاين رەجيمىندە كۋالىك پەن وتەماقى الۋعا ءوتىنىش بەردى. وسىنداي قىزمەت ەلىمىزدەگى حقكو-نىڭ كومەگىمەن دە كورسەتىلەدى. تەك 2021 جىلدىڭ وزىندە 7 مىڭعا جۋىق ادام قاعاز تۇرىندە ءوتىنىش بەرگەن.
«بۇل قىزمەت بۇرىن حقكو ارقىلى قاعاز تۇرىندە عانا كورسەتىلەتىن. ازاماتتارعا ىڭعايلى بولۋ ءۇشىن مەملەكەتتىك ورگاندارمەن بىرلەسىپ، قىزمەتتى ونلاين فورماتقا كوشىردىك. بۇل سەمەي ءوڭىرىنىڭ تۇرعىندارى ءۇشىن وتە ماڭىزدى ءارى قاجەتتى قىزمەت دەپ ويلايمىز. «ۇات» اق ۇجىمىنىڭ اتقارعان جۇمىسىنىڭ ارقاسىندا ونلاين مەملەكەتتىك قىزمەتتەردىڭ ءتىزىمى كۇننەن-كۇنگە ءوسىپ كەلەدى»، - دەپ «ۇات» اق باسقارما ءتوراعاسى روستيسلاۆ كونياشكين اتاپ ءوتتى.
قىزمەتتى پايدالانۋ ءۇشىن egov.kz پورتالىنا كىرىپ، باستى بەتتە «الەۋمەتتىك قامسىزداندىرۋ» ءبولىمىن اشىپ، «وتباسىلارعا كومەك» تارماعىن تاڭداپ، قاجەت قىزمەتتى تاڭداۋ قەرەك. ءارى قاراي، پايدالانۋشى:
- پورتالدا اۆتوريزاسيالانادى؛
- ونلاين قىزمەتكە تاپسىرىس بەرەدى؛
- بارلىق قاجەتتى جولداردى تولتىرادى؛
-ەسق نەمەسە ەكى فاكتورلى اۋتەنتيفيكاسيا كومەگىمەن وتىنىمگە قول قويادى.
مەملەكەتتىك قىزمەتتى كورسەتۋ ناتيجەسى 20 جۇمىس كۇنى ىشىندە دايىن بولادى.