بۇل تۋرالى ق ر ءىىم اكىمشىلىك پوليسيا كوميتەتى باسقارماسى باسشىسىنىڭ ورىنباسارى جاسۇلان جۇمانالين ءمالىم ەتتى.
ەلىمىزدە بالالار مەن جاسوسپىرىمدەرگە قارسى جاسالاتىن قىلمىستىڭ دەڭگەيى 17 پايىزعا ازايعان، دەپ حابارلايدى Almaty-akshamy.kz.
«بالالاردىڭ قاۋىپسىزدىگىن قورعاۋ ىشكى ىستەر ورگاندارىنىڭ قاشاندا باستى نازارىندا. جەرگىلىكتى پوليسيا قىزمەتى اتالعان سالا بويىنشا اۋقىمدى جۇمىس ىستەپ جاتىر. سونىڭ ءبىرى - قولجەتىمدى پوليسيا جانە ونىڭ قىزمەتىنىڭ موبيلدىلىگى. قابىلدانىپ جاتقان شارالاردىڭ ناتيجەسىندە بيىل بالالار مەن جاسوسپىرىمدەرگە قارسى جاسالاتىن قىلمىس 17 پايىزعا ازايدى. سونىمەن قاتار ۇرلىق 2،5 ەسەگە كەمىدى. ودان بولەك، بالالارعا الىمجەتتىك كورسەتۋ 2 ەسەگە جانە بۇزاقىلىق پەن توناۋ 3 ەسەگە تومەندەگەنى بايقالادى»، - دەدى جاسۇلان جۇمانالين.
ونىڭ ايتۋىنشا، بالالار مەن جاسوسپىرىمدەرگە قارسى زورلىق-زومبىلىق كورسەتكىشى دە ازايعان.
«بيىل 3 ايدىڭ ىشىندە بالالارعا قارسى زورلىق جاساۋ 19 پايىزعا ازايدى. بۇل باعىتتاعى زاڭناما دا ۇنەمى جەتىلدىرىلىپ وتىر. مەملەكەت باسشىسى بالالارعا زورلىق جاساعانداردىڭ جازاسىن قاتاڭداتۋدى تاپسىردى. وسى ورايدا زورلىق-زومبىلىق اۋىر قىلمىس تۇرىنە جاتقىزىلدى. سول سياقتى پەدوفيلدەر قاتاڭ رەجيمدەگى مەكەمەلەرگە جىبەرىلەدى. ولارعا كەشىرۋ نەمەسە مەرزىمىنەن بۇرىن بوساتۋ دەگەن جەڭىلدىكتەر قاراستىرىلمايدى»، - دەيدى ول.
سونداي-اق، ءىىم وكىلى قازاقستاندىقتاردى بالالارعا قارسى زورلىق-زومبىلىق جاعدايىنا بەيجاي قاراماۋعا شاقىردى. ياعني قانداي دا ءبىر فاكتىنىڭ كۋاسى بولسا، دەرەۋ پوليسياعا حابارلاعان ءجون.