ءبىلىم بەرۋ ۇيىمدارى لاڭكەستىك تۇرعىدان وسال نىساندار قاتارىنا جاتادى.
ق ر ءىىم اكىمشىلىك پوليسيا كوميتەتى باسقارماسى باسشىسىنىڭ ورىنباسارى جاسۇلان ءجۇماناليننىڭ مالىمدەۋىنشە، ەلىمىزدە ءبىلىم بەرۋ ۇيىمدارىن لاڭكەستىك ارەكەتتەردەن قورعاۋ ماقساتىندا ارنايى نۇسقاۋلىق ازىرلەنىپ، بەكىتىلدى، دەپ حابارلايدى Almaty-akshamy.kz.
«ءبىلىم بەرۋ ۇيىمدارىندا بالالاردىڭ قاۋىپسىزدىگىن قامتاماسىز ەتۋ ماڭىزدى. ۇكىمەتتىڭ تاپسىرماسىنا سايكەس، قۇزىرلى جانە قىزىعۋشىلىق تانىتقان ورگاندار بالالار قاۋىپسىزدىگىن جەتىلدىرە ءتۇسۋ جولىندا ءبىرقاتار شارالاردى اتقارىپ جاتىر. اتاپ ايتساق، ءبىلىم جانە عىلىم مينيسترلىگى جەرگىلىكتى اكىمدىكتەرمەن بىرلەسىپ ءبىلىم بەرۋ ۇيىمدارىنىڭ تەحنيكالىق جابدىقتالۋىن قامتاماسىز ەتۋدە. بۇگىندە ءبىلىم بەرۋ ۇيىمدارىندا جاپپاي بەينەباقىلاۋ كامەراسى مەن دابىل تۇيمەلەرى ورناتىلىپ جاتىر. سونىمەن قاتار مەكەمەنىڭ كىرە بەرىسىنە تەكسەرۋ بەكەتى (تۋرنيكەت) قويىلعان. ودان بولەك، مەكتەپتەگى قاۋىپسىزدىككە جاۋاپتى كۇزەت ۇيىمىنىڭ ليسەنزياسى بولۋى مىندەتتى»، - دەدى جاسۇلان جۇمانالين.
سپيكەردىڭ مالىمدەۋىنشە، ەلىمىزدەگى ءبىلىم بەرۋ ۇيىمدارىنىڭ دەنى لاڭكەستىك تۇرعىدان وسال نىساندار قاتارىنا جاتادى.
«وسى ورايدا بيىل ناۋرىزدا ءبىلىم بەرۋ ۇيىمدارىن لاڭكەستىك ارەكەتتەردەن قورعاۋدىڭ ارنايى نۇسقاۋلىعى بەكىتىلدى. اتالعان نۇسقاۋلىققا سايكەس، ءبىلىم بەرۋ ۇيىمدارىن جاراقتاندىرۋ تالاپتارى ەنگىزىلدى. بۇعان دەيىن ءبىز ءبىلىم جانە عىلىم مينيسترلىگىمەن بىرلەسىپ بەينەباقىلاۋ جۇيەسىنە قاتىستى تالاپتاردى ازىرلەگەن بولاتىنبىز. ياعني، ءبىلىم مەكەمەلەرىندەگى بەينەباقىلاۋ كامەرالارىن جەدەل ارەكەت ەتۋ ورتالىعىمەن ينتەگراسيالاۋ كەرەك»، - دەيدى ول.