سەمەيدە جۇك كولىگى اسفالت وپىرىلعان جەرگە جارتىلاي ءتۇسىپ كەتكەن. وقيعا ءساتى الەۋمەتتىك جەلىلەردە تاراپ، كوپشىلىكتىڭ قىزۋ تالقىسىنا ءتۇستى، دەپ حابارلايدى Aqshamnews.kz ءتىلشىسى.
اباي وبلىستىق پوليسيا دەپارتامەنتىنىڭ مالىمەتىنشە، وقيعا 14 قىركۇيەكتە يبرايەۆ پەن ۋرانحايەۆ كوشەلەرىنىڭ قيىلىسىندا بولعان.
"جول-قۇرىلىس جۇمىستارى كەزىندە جىلۋ تورابى ماڭىنداعى جول جابىنى وپىرىلدى. سول ساتتە 37 جاستاعى جۇرگىزۋشى باسقارعان جۇك كولىگى وسى اۋماقتان ءوتىپ بارا جاتىپ، كولىگى شڭقىرعا جارتىلاي ءتۇسىپ كەتتى. ابىروي بولعاندا، ەشكىم زارداپ شەككەن جوق. تەك ماتەريالدىق شىعىن بولدى"، - دەپ مالىمدەدى پوليسيا دەپارتامەنتىنىڭ باسپا ءسوز قىزمەتى.
ۆەدومستۆو وكىلدەرىنىڭ ايتۋىنشا، وقيعا ورنىنا دەرەۋ پوليسيا قىزمەتكەرلەرى جەتىپ، اۋماق قورشالىپ، قاۋىپسىزدىك شارالارى قابىلدانعان. ءقازىر بولعان جايتتىڭ بارلىق ءمان-جايى انىقتالىپ جاتىر.
اتالعان كوشە جوندەۋ جۇمىستارىنا بايلانىستى تۇرعىندار تاراپىنان بۇعان دەيىن دە سىنعا ىلىككەن. قىركۇيەك ايىنىڭ باسىندا قالا تۇرعىندارى جولداعى ولقىلىقتارعا نازار اۋدارۋدى سۇراعان بولاتىن.
"سەمەي قالاسى پوليسيا باسقارماسىنىڭ اكىمشىلىك پوليسيا ءبولىمى ءوز قۇزىرەتى اياسىندا بۇل اۋماقتى تەكسەرىپ، سەمەي قالاسىنىڭ جولاۋشىلار كولىگى جانە اۆتوموبيل جولدارى بولىمىنە ءتيىستى نۇسقاما بەردى. قازىرگى ۋاقىتتا يبرايەۆ كوشەسىندە جىلۋ جەلىلەرىن قالپىنا كەلتىرۋ جۇمىستارى جۇرگىزىلىپ جاتىر. جۇمىس اياقتالعاننان كەيىن بارلىق قاجەتتى جول ينفراقۇرىلىمى قالپىنا كەلتىرىلەدى"، - دەپ ناقتىلادى پوليسيا دەپارتامەنتى.