14 قىركۇيەكتە الماتىدا وتكەن "قايرات" پەن "اقتوبە" اراسىنداعى ويىننىڭ 10-مينۋتىندا الماتىلىق كلۋبتىڭ نەگىزگى قاقپاشىسى تەمىرلان اناربەكوۆ اۋىر جاراقات الىپ، الاڭنان زەمبىلمەن شىعارىلدى، دەپ حابارلايدى Aqshamnews.kz ءتىلشىسى.
"قايراتتىڭ" باس باپكەرى رافاەل ءۋرازباحتيننىڭ ايتۋىنشا، اناربەكوۆتىڭ جاق سۇيەگى سىنعان:
"مەنىڭ ويىمشا، تەمىرلاننىڭ جاق سۇيەگى سىنعان. ول بەلگىسىز ۋاقىتقا دەيىن ويىنعا قاتىسا المايدى. ول الداعى چەمپيوندار ليگاسى مەن 2025 جىلعى كپل ويىندارىنا قاتىسا المايدى"، - دەدى ۋرازباحتين.
سوعان قاراماستان، "قايرات" "اقتوبەنى" 1:0 ەسەبىمەن جەڭىپ، ماڭىزدى ءۇش ۇپايعا يە بولدى. بۇل ويىندا قاقپانى العاش رەت قورعاعان 18 جاستاعى شەرحان قالمۇرزا سەنىمدى ويىن كورسەتىپ، ءوز قاقپاسىن سوققىلاردان ساقتاپ وتىردى.
قازاقستان قۇراماسى مەن "قايراتتىڭ" قاقپاسىن قورعاپ جۇرگەن 21 جاستاعى اناربەكوۆ كەيىنگى ۋاقىتتا ناعىز جۇلدىزعا اينالعان ەدى. ول 27 تامىزدا وتكەن ۋەفا چەمپيوندار ليگاسىنىڭ پلەي-وفف كەزەڭىندە "سەلتيككە" قارسى ماچتا ءۇش بىردەي پەنالتيدى قايتارىپ، كومانداسىن تاريحتا العاش رەت توپتىق كەزەڭگە شىعاردى. سول ويىننان كەيىن جانكۇيەرلەر ونى "قاھارمان" دەپ اتاپ كەتكەن.
ايتا كەتەيىك، "قايرات" ەندى چەمپيوندار ليگاسىنىڭ توپتىق كەزەڭىندە العاش رەت ونەر كورسەتپەك. الماتى كلۋبى 30 قىركۇيەكتە ءوز الاڭىندا ايگىلى "رەال ءمادريدتى" قابىلدايدى.