بۇعان دەيىن 200-دەي باسشى جازالانعان
ق ر ءبىلىم جانە عىلىم ءمينيسترى اسحات ايماعامبەتوۆ سەمەيدە مۇعالىمدەردى كوشە تازالاۋعا جىبەرگەندەرگە قاتىستى تۇسىنىك بەردى، دەپ حابارلايدى Almaty-akshamy.kz.
بۇعان دەيىن وتاندىق باق-تا سەمەي قالاسىندا مۇعالىمدەردى كوشە تازالاۋ جۇمىسىنا تارتقانى تۋرالى مالىمەت تاراعان.
سەمەي قالاسىندا وقۋ پروسەسىنە كەدەرگى كەلتىرىپ، مۇعالىمدەردى كوشە سىپىرۋعا جىبەرگەن. شاماسى، مۇنداي تاپسىرمانى قالا اكىمىنىڭ ورىنباسارى بەرىپ، وسىنداي مازمۇنداعى حات مەكتەپتەرگە تاراتىلعان، -دەپ جازدى مينيستر facebook-تەگى پاراقشاسىنا.
ونىڭ ايتۋىنشا، 2019 جىلدىڭ جەلتوقسانىندا قابىلدانعان زاڭ شەڭبەرىندە پەداگوگتەردى وزىنە ءتان ەمەس فۋنكسيالارعا تارتۋعا تىيىم سالىنادى. سودان بەرى مۇعالىمدەر تەك تىكەلەي فۋنكسيونالدىق مىندەتتەرمەن اينالىسۋى كەرەك ەكەنىن ءتۇسىنۋ ءۇشىن ۋاقىت جەتكىلىكتى بولعان.
مۇنداي بۇزۋشىلىقتار ءۇشىن ەكى جۇزگە جۋىق باسشى جازالاندى. ولار تارتىپتىك جانە اكىمشىلىك جاۋاپكەرشىلىككە تارتىلىپ، ءتىپتى جۇمىستان شىعارىلدى. سەمەي قالاسىنداعى وقيعاعا بايلانىستى ءبىلىم بەرۋ سالاسىنداعى ساپانى قامتاماسىز ەتۋ دەپارتامەنتى اكىمشىلىك ءىس قوزعاپ، تەكسەرۋ جۇرگىزىلىپ جاتىر. قالا اكىمى ورىنباسارىنىڭ بۇل جاعدايعا قاتىستىلىعى راستالعان جاعدايدا، اتالعان لاۋازىمدى تۇلعا جانە وزگە تۇلعالار اكىمشىلىك جاۋاپكەرشىلىككە تارتىلادى،-دەپ جازدى ا. ايماعامبەتوۆ.
سونداي-اق ول قاجەتتى شارالار قابىلداۋ ءۇشىن مەملەكەتتىك قىزمەت ىستەرى اگەنتتىگىنە جۇگىنەتىندەرىن جانە قالالىق ءبىلىم ءبولىمىنىڭ باسشىسى دا جاۋاپكەرشىلىككە تارتىلادى مالىمدەدى.