بۇگىن “الماتى – ءبىزدىڭ ورتاق ءۇيىمىز” ەكولوگيالىق شاراسى اياسىندا تۇركسىب اۋدانىندا كەڭ كولەمدى سەنبىلىك ءوتتى. سەيفۋللين اتىنداعى ساياباق پەن ونىڭ ماڭايىنداعى گۇلزارلار تازارتىلىپ، اباتتاندىرۋ جۇمىستارى جۇرگىزىلدى. سەنبىلىككە 200-دەن استام ادام قاتىسىپ، قالانىڭ تازالىعىنا ءوز ۇلەستەرىن قوستى.
ساياباقتا بۇل كۇنى اپاتتى اعاشتار انىقتالىپ، كوپ جىلدىق قىلقان جاپىراقتى كوشەتتەر، شىرشالار وتىرعىزىلدى. ساياباققا تيەسىلى 9 گەكتار جەر تازارتىلىپ، قوقىستار جينالدى. مۇنداعى ورىندىقتار قالپىنا كەلتىرىلىپ، قوقىس جاشىكتەرى جاڭارتىلدى. تازالىق جۇمىستارىنا 5 ارنايى تەحنيكا جۇمىلدىرىلدى.
تۇركسىب اۋدانى اكىمى باقىتجان اقجاروۆ شارانىڭ ماڭىزدىلىعىن اتاپ ءوتتى:
- “الماتى – ءبىزدىڭ ورتاق ءۇيىمىز. ونى تازا، كورىكتى ءارى جايلى قالاعا اينالدىرۋ – ءاربىرىمىزدىڭ مىندەتىمىز. بۇگىن ءبىز تەك ساياباقتى تازالاپ قانا قويماي، ونىڭ جاڭارۋىنا دا اتسالىسىپ جاتىرمىز. بارشاڭىزدى تۋعان قالامىزدىڭ تازالىعىنا ۇلەس قوسۋعا شاقىرامىن!”
بۇل يگى باستاماعا قازاق مەملەكەتتىك سيركىنىڭ ارتىستەرى دە قولداۋ كورسەتە كەلىپتى.
- “سەنبىلىك – تەك تازالىق شاراسى عانا ەمەس، تۋعان جەرگە دەگەن سۇيىسپەنشىلىكتىڭ كورىنىسى. تابيعاتتى ايالاۋ، اينالامىزدى تازا ۇستاۋ – ءبارىمىزدىڭ ورتاق مىندەتىمىز. ءار ازامات قالامىزدىڭ كوركەيۋىنە ءوز ۇلەسىن قوسۋى كەرەك!” – دەيدى سيرك ءارتىسى ەركەبۇلان سۇلەيمەنوۆ.
ال “Nomad” كاسكادەرلىك توبىنىڭ مۇشەسى باقىت كەنجەحان ءوز ويىن بۇلايشا جەتكىزدى:
- “ءبىز “Nomad” كاسكادەرلىك توبىنىڭ مۇشەلەرى وسى باستاماعا قولداۋ كورسەتۋگە كەلدىك. ءبارىمىز بىرگە ەڭبەك ەتىپ، قورشاعان ورتانى تازارتىپ، تابيعاتتىڭ جاڭارۋىنا ۇلەس قوسىپ جاتىرمىز. مۇنداي شارالار ادامداردى جاقىنداستىرىپ، ورتاق ماقساتقا بىرىكتىرەدى. قالامىزدى تازا، كورىكتى ەتىپ ساقتايىق! ويتكەنى الماتىنىڭ تازالىعى بارىمىزگە ورتاق.”
ءاپ- ساتتە سەنبىلىككە قاتىسۋشىلار وزدەرى جيناعان جەردىڭ تازارعانىن كورىپ، قۋانىپ جاتىر. ال شارانى ۇيىمداستىرۋشىلار مۇنداي تازالىق جۇمىستارىنىڭ ءالى دە جالعاسا بەرەتىنىن ايتادى.
“قالانىڭ تازالىعى – ونىڭ تۇرعىندارىنىڭ مادەنيەتىنە دە تىكەلەي قاتىستى” دەگەن ءسوز بار. بۇل بارىمىزگە قاتىستى ايتىلسا كەرەك.
الماتىنى ايالايىق! ول ءسىز بەن ءبىزدىڭ قولىمىزدان كەلەدى!