ناۋرىزباي اۋدانىنداعى ساق قورعانى اۋماعىندا كەڭ كولەمدى سەنبىلىك ءوتتى
ناۋرىزباي اۋدانىندا وتكەن سەنبىلىككە 250-دەن استام ادام قاتىستى. ولاردىڭ قاتارىندا اۋدان اكىمدىگى اپپاراتىنىڭ قىزمەتكەرلەرى، قازاقستان حالقى اسسامبلەياسىنىڭ وكىلدەرى، تانىمال مەديا تۇلعالار، كوممۋنالدىق قىزمەت ماماندارى جانە بەي-جاي قارامايتىن قالا تۇرعىندارى بولدى.
– جاستايىمنان قوعامدىق جۇمىستارعا بەلسەندى تۇردە قاتىسىپ كەلەمىن. بۇگىنگى كۇن دە مەن ءۇشىن ەرەكشە ەمەس، ويتكەنى الماتى – ءبىزدىڭ ورتاق ءۇيىمىز. قالا تازالىعى مەن ءتارتىبى ءاربىر تۇرعىنعا بايلانىستى. وسى ءساتتى پايدالانا وتىرىپ، بارشاڭىزعا بەيبىتشىلىك، جاقسىلىق جانە مولشىلىق تىلەيمىن. قاسيەتتى ناۋرىز مەرەكەسى قۇتتى بولسىن! – دەدى قازاقستاننىڭ ەڭبەك سىڭىرگەن ءارتىسى ەرلان كوكەيەۆ.
ناۋرىزباي اۋدانىنىڭ ۇيعىر ەتنومادەني ورتالىعىنىڭ وكىلدەرى وسىنداي يگى شارالارعا جىل سايىن بەلسەنە اتسالىسادى.
– ءبىز بۇعان دەيىن دە مۇنداي سەنبىلىكتەرگە قاتىسىپ جۇرگەنبىز. بۇل جولى دا ەشكىم بەي-جاي قالعان جوق. بارلىق قاتىسۋشىلارعا ارناپ ءدامدى پالاۋ مەن باۋىرساق ازىرلەدىك، – دەدى ناۋرىزباي اۋدانىنداعى ەتنومادەني ورتالىقتىڭ ءتوراعاسى باحتيار يسمايلوۆ.
ايتا كەتۋ كەرەك، تازالىق جۇمىستارىنا 18 ارنايى تەحنيكا جۇمىلدىرىلىپ، 150 تەكشە مەتر قوقىس پەن قىس بويى جينالعان توپىراق شىعارىلدى. كوممۋنالدىق قىزمەتكەرلەر اعاشتاردى سانيتارلىق قىرقۋدان وتكىزىپ، جاسىل ايماقتاردى تازالاپ، قورشاۋلاردى، ورىندىقتار مەن قوقىس جاشىكتەرىن سىرلادى. سونداي-اق، كوشەلەر مەن جاياۋ جۇرگىنشىلەر جولدارى جۋىلدى.
ناۋرىزباي اۋدانىندا وتكەن بۇل سەنبىلىك بىرلىكتىڭ، تۋعان قالاعا دەگەن قامقورلىق پەن ونىڭ تاريحىنا قۇرمەت كورسەتۋدىڭ سيمۆولىنا اينالدى. الماتى – ءبىزدىڭ ورتاق ءۇيىمىز، جانە ونىڭ تازالىعى ءارقايسىمىزعا تىكەلەي بايلانىستى.