بۇگىن قايىرىمدىلىق كۇنىنە وراي "ناۋرىز قۇپياسى" قويىلىمىنىڭ پرەمەراسى ءوتتى.
جاس كورەرمەندەردىڭ اراسىندا كوپ بالالى جانە از قامتىلعان وتباسىلاردان شىققان بالالار، سونداي-اق ەرەكشە قاجەتتىلىكتەرى بار بۇلدىرشىندەر بولدى. ءبىر ساعاتتاي ۋاقىت ىشىندە كىشكەنتاي قوناقتارعا ناۋرىزدىڭ ەجەلگى تاريحى، مەرەكەگە بايلانىستى سالت-داستۇرلەر مەن ۇلتتىق تاعامدار – ناۋرىز كوجە تۋرالى ايتىلدى.
ساحنادا قىدىر اتا، كۇن مەن ءتۇن سياقتى كەيىپكەرلەر، سونداي-اق شىعىس كۇنتىزبەسى بويىنشا تىشقاننان قابانعا دەيىنگى ميفولوگيالىق جانۋارلار ومىرگە كەلدى. سيۋجەتتە ءار جانۋار جىلدىڭ مەسەناتى اتاعىنا لايىق ەكەنىن دالەلدەۋگە تىرىستى جانە وزىنە ءتان ەرەكشە قابىلەتتەرىن كورسەتتى. كۇن مەن ءتۇن تورەشى ءرولىن اتقارىپ، قاتىسۋشىلاردى اقىلدىلىعىمەن، تاپقىرلىعىمەن جانە ەپتىلىگىمەن باعالادى. ءبىراق ەڭ ماڭىزدى شەشىمدى، ارينە، قىدىر اتا قابىلدادى.
قۋىرشاق تەاترىنىڭ ءداستۇرى بويىنشا سپەكتاكلگە ينتەراكتيۆتى ەلەمەنتتەر ەنگىزىلدى. وسىنىڭ ارقاسىندا كورەرمەندەر بەلگىلى ءبىر كەزەڭدە قويىلىمعا قاتىسۋشىلارعا اينالادى.
— بۇل سپەكتاكل – قۋىرشاق تەاترىنىڭ 90 جىلدىعىنا ارنالعان العاشقى پرەمەرامىز. وندا قۋىرشاق ونەرى مەن قازاق حالقىنىڭ باي فولكلورى ۇيلەسىمدى توعىسادى، — دەدى مەملەكەتتىك قۋىرشاق تەاترىنىڭ ديرەكتورى المات امانگەلدى. — بىرەگەي كەيىپكەرلەر، ءتۇرلى-تۇستى كوستيۋمدەر مەن ديناميكالىق سيۋجەت "ناۋرىز قۇپياسىن" بالالار ءۇشىن دە، ەرەسەكتەر ءۇشىن دە قىزىقتى ەتەدى. سونىمەن قاتار، بۇل – تەاترىمىزدىڭ تالانتتى اكتەرى شوحان قۇلنازاروۆتىڭ دەبيۋتتىك رەجيسسەرلىك جۇمىسى. ءبىز ونىڭ شىعارماشىلىق ىزدەنىستەرىن قولداۋعا شەشىم قابىلدادىق، ويتكەنى ءار رولىندە ول ونەرگە دەگەن ادالدىعىن كورسەتەدى.
سپەكتاكلدى تەاتردىڭ بارلىق قويىلىمدارى سياقتى ەكى تىلدە – ورىس جانە قازاق تىلدەرىندە تاماشالاۋعا بولادى.
ازىرلەگەن: اياجان سەرىك قىزى