ساۋىردە شەتەل ۆاليۋتاسىنا سۇرانىس ازايعان

ساۋدا-ساتتىقتىڭ ورتاشا كۇندىك كولەمى 179 ميلليون دوللاردان 92 ميلليون دوللارعا دەيىن قىسقاردى.

ۇلتتىق بانك ءتوراعاسى عالىمجان ءپىرماتوۆتىڭ ايتۋىنشا، ءساۋىر ايىندا شەتەل ۆاليۋتاسىنا سۇرانىس ازايعان، دەپ حابارلايدى Almaty-akshamy.kz

وتكەن ايدا تەڭگە باعامى 4،6 پروسەنتكە نىعايدى.

ايتۋىنشا، وتكەن ايدا جاھاندىق قارجى نارىعىنداعى قۇبىلمالىلىقتىڭ جالعاسۋىنا قاراماستان، تەڭگە باعامى 1 دوللار ءۇشىن 445،62 تەڭگەگە دەيىن نەمەسە 4،6%-كە نىعايدى.

«ساۋىردە شەتەل ۆاليۋتاسىنا سۇرانىستىڭ ايتارلىقتاي ازايۋى بايقالدى. قازاقستان قور بيرجاسىنداعى ساۋدا-ساتتىقتىڭ ورتاشا كۇندىك كولەمى 179 ميلليون دوللاردان 92 ميلليون دوللارعا دەيىن قىسقاردى»، - دەدى ءپىرماتوۆ.

كۆازيمەملەكەتتىك سەكتور سۋبەكتىلەرىنىڭ ۆاليۋتالىق ءتۇسىمدى ساتۋى ۆاليۋتا نارىعىنا قولداۋ كورسەتتى. ونىڭ كولەمى ساۋىردە شامامەن 253،2 ميلليون دوللاردى قۇرادى. رەسپۋبليكالىق بيۋدجەتكە بەرىلەتىن ترانسفەرتتەردى قامتاماسىز ەتۋ ءۇشىن ساۋىردە ۇلتتىق قوردان 168،3 ميلليون دوللار ساتىلدى. ۇلتتىق قوردان ساتۋ ۇلەسى ساۋدا-ساتتىقتىڭ جالپى كولەمىنىڭ 8،7%-ىنە تەڭ بولدى.

ءپىرماتوۆ ىشكى ۆاليۋتا نارىعىندا جاعدايدىڭ تۇراقتالۋىنا بايلانىستى ۇلتتىق بانك ساۋىردە ۆاليۋتالىق ينتەرۆەنسيا جۇرگىزبەگەنىن اتاپ ءوتتى.

«الداعى ۋاقىتتا گەوساياسي جاعدايدىڭ قالاي ءوربيتىنى بەلگىسىز. سول سەبەپتى قىسقا مەرزىمدى پەرسپەكتيۆادا تەڭگەنىڭ قۇبىلمالىلىق تاۋەكەلى ساقتالادى. ۇلتتىق بانك تەڭگەرىمسىزدىككە جول بەرمەيتىن جانە التىن-ۆاليۋتا رەزەرۆتەرىنىڭ ساقتالۋىن قامتاماسىز ەتەتىن ەركىن باعام رەجيمىن ۇستانا بەرەدى»، - دەدى ءپىرماتوۆ.