ماۋسىمنىڭ 5 كۇنى قازاقستاندا كونستيتۋسياعا تۇزەتۋلەر بويىنشا رەفەرەندۋم وتەتىن بولدى.
الماتى قالاسى قوعامدىق كەڭەس مۇشەسى بوريس دجاپاروۆ قازاقستاندىقتاردى ماۋسىمنىڭ 5 كۇنى وتەتىن رەفەرەندۋمعا بەلسەنە قاتىسۋعا شاقىردى، دەپ حابارلايدى Almaty-akshamy.kz.
«قۇرمەتتى وتانداستار، قازاقستان حالقى تاريحي دامۋدىڭ شەشۋشى كەزەڭىنىڭ الدىندا تۇر. ەسكى كوممۋنيستىك رەجيمنىڭ كۇيرەۋىنەن سوڭ تاۋەلسىزدىگىن العان ەلىمىزدىڭ سۋپەرپرەزيدەنتتىك باسقارۋ جۇيەسى بۇگىنگى كۇن تالابىنا ساي ەمەستىگىن «قاڭتار قىرعىنى» ايقىن كورسەتتى.
سۋپەرپرەزيدەنتتىك بيلىك 30 جىلدا قازاقستاندى «سۋپەر مەملەكەتكە» اينالدىرا المادى، كەرىسىنشە ەل ەكونوميكاسى مەن حالىقتىڭ الەۋمەتتىك جاعدايى كۇرت تومەندەپ كەتتى. وسى ۋاقىت ىشىندە جوعارى بيلىككە ەتەنە جاقىن 160-قا جۋىق وليگارحيالىق توپتار پايدا بولىپ، ەل داۋلەتىنىڭ قىزىعىن، حالىق ەمەس، تەك سولار كوردى. قاسىم-جومارت كەمەل ۇلى توقايەۆتىڭ پرەزيدەنت بولىپ سايلانۋىنان كەيىن ەتەك الا باستاعان دەموكراتيالىق وزگەرىستەر قازاقستان حالقىنىڭ قولداۋىنا يە بولا باستاعان كەزدە، ۇزاق جىلدار شەكسىز بيلىك پەن بايلىققا داعدىلانعان، وسى توپتىڭ «مارقاسقالارى» توڭكەرىس جولىمەن مەملەكەتتەگى ساياسي بيلىكتى ءوز قولدارىنا قايتا الۋعا قارۋلى ارەكەت جاساپ، تاۋەلسىزدىك تاعدىرىنا قاۋىپ ءتوندىردى.
مىنە وسىنداي كۇن ەل باسىنا قايتادان تونبەۋ ءۇشىن، ەلىمىزدى دامىعان داۋلەتتى دە، ادىلەتتى، شىن مانىندەگى دەموكراتيالىق مەملەكەتتەر قاتارىنا قوسۋ ماقساتتا پرەزيدەنت قاسىم-جومارت كەمەلۇلىتوقايەۆ «جاڭا قازاقستان» تۇجىرىمداماسى مەن باعدارلاماسىن ۇسىنىپ، بۇقارا حالىقتىڭ كوڭىلىنەن شىقتى.
باعدارلامادا كورسەتىلگەن يگى ماقساتتارعا قول جەتكىزۋ ءۇشىن ەڭ الدىمەن وزگەرىستەردىىڭ زاڭدىق نەگىزدەرىن قۇرۋ قاجەت. سول سەبەپتەن ۇستىمىزدەگى جىلى ماۋسىم ايىنىڭ 5ء-ى كۇنى قازاقستاندا كونستيتۋسياعا تۇزەتۋلەر بويىنشا رەفەرەندۋم وتەتىن بولدى. رەفەرەندۋمعا قاتىسۋشىلار ۇسىنىلعان ءاربىر تۇزەتۋلەر بويىنشا ءوز پىكىرىن بىلدىرە الادى. «اقىلداسىپ پىشكەن تون كەلتە بولماس» دەگەن حالىق. سوندىقتان، ەلىمىزدىڭ ءار ازاماتىن رەفەرەندۋمعا بەلسەنە قاتىسىپ، باتىلدىق تانىتىپ، ەل بولاشاعىن ايقىندايتىن اتا زاڭىمىزدىڭ ساپالى دا مازمۇندى بولىپ شىعۋىنا جەكە ۇلەسىن قوسۋعا شاقىرامىن»، - دەپ جازدى بوريس دجاپاروۆ الەۋمەتتىك جەلىدەگى پاراقشاسىندا.