12 مامىر – حالىقارالىق مەيىربيكەلەر كۇنى.
الماتى قالالىق قان ورتالىعىنىڭ جوعارى ساناتتى مەيىرگەرى اينۇر المەسوۆا ءوز ماماندىعىن قالاي تاڭداپ كەلگەنىن ايتتى، دەپ حابارلايدى Almaty-akshamy.kz.
ءار ادامنىڭ بولاشاقتا كىم بولاتىنىن ونىڭ بالالىق شاقتاعى ويىنىنان بايقاۋعا بولادى دەسەك، الماتى قالالىق قان ورتالىعىنىڭ قان جانە ونىڭ كومپونەنەتتەرىن دايىنداۋ ءبولىمىنىڭ اعا مەيىرگەرى اينۇر كەنەباي قىزى المەسوۆا ءوزىنىڭ اق حالاتتى ابزال جان بولعىسى كەلەتىنىن سول بالا كەزىنەن-اق توڭىرەگىنە بايقاتاتىن. وزگە قىزبالالار قۋىرشاق ويناۋعا جاقىن بولسا، كىشكەنتاي اينۇر كەرىسىنشە، سول قۋىرشاقتاردى تەكسەرىپ، ءدارى جازىپ بەرىپ وينايتىن-دى. كەيىن وسە كەلە دە سول ويىنى ۇلكەن ارمانعا اينالعان ول «وسكەندە كىم بولاسىڭ؟» دەگەن ساۋالعا دارىگەر بولامىن دەپ جاۋاپ بەرەتىن.
مەكتەپ بىتىرگەن جىلى مەديسينالىق ۋنيۆەرسيتەتكە قۇجات تاپسىرعان، ءبىراق وعان ءتۇسۋ ءۇشىن جوعارى بالل جيناۋ قاجەت بولعاندىقتان بايقاۋدان وتە المادى. ايتسە دە قايسار قىزدىڭ وعان تاۋى شاعىلا قويعان جوق، الماتى قالاسىنداعى «اياجان» مەديسينالىق كوللەدجىنە قۇجات تاپسىرىپ، ب ا ق سىناپ كورمەك بولعان ونىڭ جولى بولىپ، «مەيىربيكە ءىسى» ءبولىمى بويىنشا وقۋعا قابىلداندى. سونداعى اينۇردىڭ قۋانىشىن سوزبەن ايتىپ جەتكىزۋ مۇمكىن ەمەس ەدى، بالا كەزدە قۋىرشاققا ۋكول سالىپ وينايتىن اينۇر قىز ەندى قۋىرشاقتاردىڭ ەمەس، ناۋقاس ادامداردىڭ سىرقاتىنان ساۋىعىپ كەتۋىنە سەبەپكەر بولاتىن مەيىربيكە بولاتىنىنا قۋانعان. سودان بەرى دە زىمىراپ جيىرما جىل وتە شىعىپتى. اينۇر ءوزى قالاعان ماماندىعى بويىنشا ابىرويلى قىزمەت اتقارىپ كەلەدى.
اينۇردىڭ قولىنان ەم-شارا قابىلداعان ناۋقاستار وعان ۇنەمى «اينالايىن، قولىڭ جەڭىل ەكەن، ەمىڭ دەرتىمىزگە شيپا بولسىن» دەپ العىس ايتقاندا ول مەيرەيلەنە تۇسەتىن. بىردە ونىڭ قۇربىسىنىڭ تۋىسى ناۋقاستانىپ، قالالىق قان ورتالىعىنا قان تاپسىرۋعا كەلگەن بولاتىن، ورتالىقتاعى مەيىربيكەلەردىڭ جۇمىسى، ورتالىق قىزمەتكەرلەرىنىڭ كەلگەن ادامدارعا دەگەن ىقىلاستارى ونى بىردەن باۋراپ العانى. ەرتەسى كۇنى قان ورتالىعىنىڭ كادرلار بولىمىنە جولىعۋتۋرالى شەشىم قابىلدادى. جولى بولىپ كەتتى. بالا كۇتىمىنە بايلانىستى دەمالىسقا كەتكەن ءبىر مەيىربيكەنىڭ ورنى ۋاقىتشا بوس ەكەن، ول ۋاقىتشا بولسا دا سول ورىنعا جۇمىس ىستەي تۇرۋعا كەلىسكەن اينۇر ەرتەسىنە-اق ورتالىق قىزمەكتەرلەرىمەن بۇرىننان بىرگە جۇمىس ىستەپ كەلە جاتقانداي تەز باۋىر باسىپ كەتتى. تاۋلىگىنە قانشاما ادام ەت جاقىنىنىڭ ءومىرىن ساقتاپ قالۋ ءۇشىن قان بەرۋ ارقىلى كۇرەسسە، جۇرەگىنىڭ تامىرلارى ادامگەرشىلىك قاعيدالارىمەن ورىلگەن ەرىكتى دونورلاردىڭ ءوزى تانىپ بىلمەيتىن ادامداردىڭ ءومىرىن ساقتاپ قالۋ جولىندا قان بەرىپ، بىرەۋگە ءومىر سىيلاپ جاتقانىن كورگەن اينۇرعا بۇل ورتالىق قايىرىمدىلىق ورتالىعى سياقتى كورىنگەن.
وعان قاڭتار وقيعاسى كەزىندەگى ەرىكتى دونورلاردىڭ قايسارلىعى تاعى كوزىن جەتكىزدى. قان دونورلارى وزدەرىنىڭ ومىرلەرىنە ءقاۋىپ ءتونىپ تۇرعانىنا قاراماستان، جارالانعان جاۋىنگەرلەرىمىزدىڭ، پوليسيا قىزمەتكەرلەرى مەن بەيبىت تۇرعىنداردىڭ ءومىرىن ساقتاپ قالۋ ءۇشىن قان تاپسىرۋعا ۇزدىكسىز كەلىپ جاتتى. ال سول وقيعا كەزىندە ورتالىق قىزمەتكەرلەرىنىڭ وزدەرى دە باستاما كوتەرىپ، قان تاپسىرعان بولاتىن. يىعىنا اق حالات ىلگەن ادام ءۇشىن قايىرىمدىلىق جاساۋدان اسقان ساۋاپتى ءىس بولماسا كەرەك.
ءسويتىپ، 2010 جىلى الماتى قالالىق قان ورتالىعىنا دونور بولىپ كەلگەن اينۇر ورتالىقتىڭ مەديسينالىق مەيىربيكەسى لاۋازىمى بويىنشا جۇمىسقا قابىلدانىپ، ءبىرجولا وسى ورتالىقتا قالىپ قويدى. ءوز جۇمىسىنا جاۋاپتى، كاسىبىن جەتىك مەڭگەرگەن اينۇر كەنەباي قىزى المەسوۆا قازىرگى كۇنى ورتالىقتىڭ ەڭ ۇزدىك مەيىرگەرلەرىنىڭ ءبىرى. ءوزى ۋاقىتشا جۇمىسقا قابىلدانعان قان جانە ونىڭ كومپونەنتتەرىن دايىنداۋ ءبولىمىنىڭ اعا مەديسينالىق مەيىربيكەسى. ورتالىقتاعى مەيىربيكەلەر كەڭەسىنىڭ مۇشەسى. جاڭادان جۇمىسقا قابىلدانعان جاس ماماندارعا بىلگەنىن ۇيرەتۋدەن جالىقپايتىن ءتالىمدى تالىمگەر.
«ماعان مەيىرگەر دەگەن ءسوز قاتتى ۇنايدى. مەيىرگەر دەگەن ءسوز ۇدايى ىمەنىڭ جۇرەگىمە مەيىرىمدىلىك نۇرىن سەۋىپ تۇراتىنداي، سوندىقتان بولار ماماندىعىمدى ماقتان تۇتامىن»،– دەيدى الماتى قالالىق قان ورتالىعىنىڭ جوعارى ساناتتى مەيىرگەرى اينۇر المەسوۆا.
ۇدايى ءوزىن كاسىبي جاعىنان جەتىلدىرىپ، بىلىم-بىلىكتىلىگىن ارتتىرىپ وتىراتىن اينۇر المەسوۆا ءوزىنىڭ ارىپتەستەرىمەن قاتار، حالىقارالىق مەيىربيكەلەر كۇنىن قىزمەتىندەگى جەتىستىكتەرىمەن، ۇجىمداعى اسقان ابىرويىمەن قارسى الدى. ەڭ قۋانىشتىسى مەرەكە قارساڭىندا ول «امانات» پارتياسىنىڭ مۇشەلەگىنە قابىلدانىپ، باستاۋىش پارتيا ۇيىمىنىڭ العىس حاتىمەن ماراپاتتالدى. ۇجىمنىڭ بۇل قۇرمەتى ونىڭ ءوز جۇمىسىنا دەگەن جاۋاپكەرشىلىگىن بۇرىنعىدان دا ارتتىرا تۇسكەنى انىق.