ساۋدا ورىندارى سۇرىلەدى

بيىلعى جىلدىڭ ەكىنشى توقسانىندا الماتىدا زاڭسىز سالىنعان ساۋدا نىساندارىن ءسۇرۋ باستالادى.

 بۇل تۋرالى وكق بريفينگىندە الماتى قالاسىنىڭ كاسىپكەرلىك جانە ينۆەستيسيالار باسقارماسىنىڭ باسشىسى بەرىك سولتانبايەۆ ايتتى،-دەپ حابارلايدى Almaty-akshamy.kz. 

سپيكەردىڭ ايتۋىنشا، 2022 جىلى جۇرگىزىلگەن مونيتورينگ ناتيجەلەرى بويىنشا مەگاپوليستە 500-دەن استام زاڭسىز ورناتىلعان ستاسيونارلىق ەمەس ساۋدا نىساندارى انىقتالعان. بۇل رەتتە زاڭسىز ورناتىلعان پاۆيلوندار، دۇڭگىرشەكتەر مەن كيوسكىلەر ەلەكتر جەلىسىنە قوسىلعان، كەيبىرىندە جىلۋ بار.

«ءبىز ءقازىردىڭ وزىندە زاڭسىز ستاسيونارلى ەمەس ساۋدا نىساندارىنىڭ مەنشىك يەلەرىمەن ءوز ەركىمەن ءسۇرۋ بويىنشا ءتۇسىندىرۋ جۇمىستارىن جۇرگىزىپ جاتىرمىز. سوندىقتان، الداعى ۋاقىتتا ستاسيونارلىق ەمەس ساۋدا نىساندارىن وزدىگىنەن سالۋدىڭ الدىن الۋ ءۇشىن الماتىنىڭ قالالىق جوسپارلاۋ جانە ۋربانيستيكا باسقارماسى ستاسيونارلىق ەمەس ساۋدا نىساندارىن ورنالاستىرۋ سىزبالارىن ازىرلەۋدە. ەندى ستاسيونارلىق ەمەس ساۋدا نىساندارىن قاتاڭ تۇردە وسى سىزباعا سايكەس ورناتۋعا رۇقسات بەرىلەدى»، - دەدى ب. سولتانبايەۆ.

ورنالاستىرۋ سىزبالارى بەكىتىلگەننەن كەيىن 2023 جىلدىڭ ەكىنشى توقسانىندا جەرگىلىكتى اتقارۋشى ورگاندار زاڭسىز ستاسيونارلى ەمەس ساۋدا نىساندارىن ءسۇرۋ جۇمىستارىن باستايدى. مۇنداي «نۇكتەلەر» ينجەنەرلىك جەلىلەردەن اجىراتىلادى.

سونىمەن قاتار، ەرەجەگە باعىنبايتىن ساۋداگەرلەرگە قاتىستى ق ر اقبتك-نىڭ 204 جانە 505-باپتارى بويىنشا ايىپپۇل تۇرىندەگى اكىمشىلىك شارالار قولدانىلاتىن بولادى.

انىقتاما ءۇشىن: ق ر اقبتك-تىڭ 204-بابى – ەسكەرتۋ نەمەسە 5 اەك كولەمىندە ايىپپۇل، قايتالاعان جاعدايدا ايىپپۇل 10 اەك. ق ر اقبتك-نىڭ 505-بابى بويىنشا – جەكە تۇلعالارعا ەسكەرتۋ نەمەسە ايىپپۇل سالۋ – 20 اەك، شكس - شكس – 30 اەك، وكس – 50 اەك، قايتالاپ بۇزعان جاعدايدا جەكە تۇلعالار ءۇشىن ايىپپۇل - 30 اەك، شوك – 40 اەك، اقك – 50 اەك. 1 اەك = 3 450 تەڭگە.