بۇل ورتالىققا وسىمەن ءتورتىنشى مارتە «بومبا قويىلدى»
الماتىدا ساۋدا ويىن-ساۋىق ورتالىقتارىنىڭ بىرىنە بومبا قويىلعانى تۋرالى اقپارات جالعان بولىپ شىقتى، دەپ حابارلايدى Almaty-akshamy.kz قازاقپارات-قا سىلتەمە جاساپ.
الماتى قالالىق پوليسيا دەپارتامەنتىنىڭ مالىمەتىنشە، ساۋدا ويىن-ساۋىق ورتالىعىنا بومبا قويىلعانى تۋرالى قوڭىراۋ 102 پۋلتىنە بۇگىن تۇسكەن.
«ساۋدا ويىن-ساۋىق ورتالىعىنىڭ اكىمشىلىگى، كۇزەت قىزمەتى جانە قۇقىق قورعاۋ ورگاندارى جالعا الۋشىلار مەن كەلۋشىلەردى ەۆاكۋاسيالاۋ ءۇشىن، سونداي-اق، قۇقىق قورعاۋ ورگاندارىنىڭ ءىس-شارالاردى ودان ءارى جۇزەگە اسىرۋى ءۇشىن ءتيىستى سەناريي ازىرلەدى. قىسقا مەرزىمدە قابىلدانعان ءىس-شارالار ناتيجەسىندە حابارلامانىڭ جالعان ەكەندىگى انىقتالدى»، - دەپ حابارلادى ۆەدومستۆودان.
الماتى پوليسياسى تۇرعىنداردى جۇرگىزىلىپ جاتقان قاۋىپسىزدىك شارالارىنا تۇسىنىستىكپەن قاراۋعا شاقىرادى. بۇعان دەيىن «MOSKVA metropolitan» ساۋدا ويىن-ساۋىق ورتالىعىنىڭ كەلۋشىلەرى ەۆاكۋاسيالانعانىن جازعان بولتىنبىز. ايتا كەتەيىك، اتالعان ورتالىققا «بومبا قويىلدى» دەگەن اقپارات ماۋسىم ايىنان بەرى ءتورتىنشى رەت تارادى.