مۇنىڭ گەوساياسي جاعدايعا ەش قاتىسى جوق.
بۇل تۋرالى دسم دارى-دارمەك ساياساتى دەپارتامەنتىنىڭ ديرەكتورى باۋىرجان ءجۇسىپوۆ مالىمدەدى، دەپ حابارلايدى Almaty-akshamy.kz
«پاندەميا باستالعان سوڭ، ءبىز قاراعاندىدا دايىن سۋبستانسيادان «سپۋتنيك V» ۆاكسيناسىنىڭ ءوندىرىسىن ىسكە قوستىق. ءقازىر بۇل پروسەسس توقتاپ تۇر. بۇگىنگى تاڭدا ۆاكسينانىڭ كولەمى جەتكىلىكتى»، - دەپ اتاپ ءوتتى دەپارتامەنت ديرەكتورى.
سونىمەن قاتار ول الداعى ۋاقىتتا قانداي ۆاكسينالار ساتىپ الىنۋى مۇمكىندىگىنە توقتالدى.
«سپۋتنيك V» ەكپەسىنە قاتىستى ايتار بولساق، بۇگىندە كەلىسسوزدەر جۇرگىزىلىپ جاتقان جوق. قاراعاندىداعى زاۋىت بۇل ۆاكسينانى شىعارمايدى. مۇنىڭ گەوساياسي جاعدايمەن ەش قاتىسى جوق. ەلىمىزدە كوروناۆيرۋس ينفەكسياسىنا قارسى ۆاكسينانىڭ 1،6 ملن دوزاسى بار، - دەدى ۆەدومستۆو وكىلى.
ەسكە سالا كەتەيىك، بۇعان دەيىن رەسپۋبليكادا ۆاكسيناسيا ءۇشىن ۆاكسينانىڭ 3 ءتۇرى – كازۆاك، سينوفارم مەن پفايزەر بار ەكەندىگى ايتىلدى. ال ريەۆاكسيناسيا ءۇشىن – كازۆاك پەن سينوفارمدى الۋعا بولادى. ءقازىر كوروناۆيرۋسقا قارسى ۆاكسينامەن ءتيىستى حالىقتىڭ 80%-دان استامى نەمەسە بۇكىل حالىقتىڭ 56%-دان استامى قامتىلدى. ءى كومپونەنتتى 10،7 ملن ادام، ءىى كومپونەنتى 10،4 ملن ادام الدى. تاۋلىگىنە 5 مىڭنان استام ادام ەكپە سالدىرادى.