جارقىن جاز دەمالىسقا دا، قۇرىلىسقا دا ىڭعايلى مەزگىل عوي. ءتىپتى، تۋعان جەرىمىزگە دە، الىستاعى اعايىنعا دا كوبىنە وسى مەزگىلدە ات باسىن بۇرامىز. جىل بويعى ەڭ كۇردەلى دەگەن ءىستىڭ ءوزىن وسى جازعا قالدىرامىز. ءتىپتى، جازعى دەمالىستى وتكىزۋدىڭ ءوزى ۇلكەن ماسەلەدەي كورىنەدى. سوندىقتان «ءسىز جازدا قايدا دەمالاسىز؟» دەگەن ساۋالدى ورتاعا سالدىق.
اسىلى وسمان، قوعام قايراتكەرى: ءبىر سەرپىلىپ، سەرگىپ قالدىم
مەن جازعى دەمالىسىمدى باستاپ تا كەتتىم. ءقازىر قالا سىرتىنداعى شيپاجايدا دەمالىپ جاتىرمىن. تازا اۋامەن تىنىستاپ، ەم قابىلداپ جاتقان ءجايىم بار. مەيىرىمدى مەيىربيكەلەر، ساۋساعىنىڭ ءوزى سيقىرلى دارىگەر باۋىرلارىم جان-جاعىمنان «اپايلاپ» جانى قالماي جاتىر. ادامعا وسىنىڭ ءوزى جاقسى دەمالىس ەمەس پە؟ ءبىر سەرپىلىپ، سەرگىپ قالدىم. جالپى، مەن بۇرىننان-اق الىسقا كەتىپ، دەمالىس ىزدەگەن كىسى ەمەسپىن. ماعان حالىقتىڭ اراسىندا بولىپ، شەشىلىپ اڭگىمە قۇرعان ۇنايدى. سوسىن جاسى كەلگەن ادام تۋعان جەرىن اڭساپ تۇرادى ەكەن. مەن دە بيىل ەل جاققا بارىپ قايتسام با دەپ ەدىم. ونىڭ ءساتى تۇسپەيتىن سىڭايلى. كۇن دەگەنىڭ ەرەكشە ىسىپ كەتتى. ونىڭ ۇستىنە وڭتۇستىكتىڭ جازى بۇدان دا زور، ەكى ەسە ىستىق. ءارى ۇلكەن كىسىگە الىسقا جول ءجۇرۋ دە وڭاي ەمەس ەكەن. سوندىقتان بيىلعى جازدى الماتىدا وتكىزەتىن سىڭايلىمىن.
مايرا ءىلياسوۆا، قازاقستاننىڭ ەڭبەك سىڭىرگەن ءارتىسى: الاكولدىڭ شيپالى سۋىنا شومىلامىن
نەگىزى، جازدا ءبىر دەمالىپ العان دۇرىس قوي. قىستا جوسپارلاعان جۇمىستارىم وتە كوپ بولىپ تۇر. سول شارۋالاردى ءبىتىرىپ تاستايىن دەپ شاپقىلاپ جۇرگەن جايىم بار. ءساتىن سالسا، نەمەرەلەرىمدى الىپ، الاكولگە دەمالىپ قايتساق پا دەپ وتىرمىز. سىرتقا، شەتەلگە كەتۋ دەگەن جوسپار جوق. مەن ءۇشىن الاكولدىڭ شيپالى سۋىنا شومىلعاننان ارتىق دەمالىس جوق. بالالار دا وسى باستان ءوز ەلىمىزدە دەمالعاندى ۇيرەنسىن دەپ، ادەيى ءوزىم باستاپ بارعالى وتىرمىن. بيىلعى ءبىراز ونەر ساپارى دا وسى مەزگىلمەن تۇسپا-تۇس كەلىپ تۇر.
مەرەكە سمايلوۆا، پروديۋسەر، «مەرەكە» ورتالىعىنىڭ جەتەكشىسى: ۇلكەن بايقاۋعا ازىرلىك ۇستىندەمىز
ءقازىر ءبىز ۇلكەن بايقاۋعا ازىرلىك ءۇستىندەمىز. ەكى اپتادان كەيىن لوندونعا ۇشقالى وتىرمىز. ونەرپاز بالالاردىڭ ۇلكەن حالىقارالىق ءان بايقاۋىنا قاتىسپاقشىمىز. شەتەلگە شىقتى دەگەن اتى بولماسا، بۇل دا دايىندىق، ەڭبەكتى تالاپ ەتەدى. شىنى كەرەك، ىشتەي قاتتى قوبالجىپ ءجۇرمىن. ءساتىن سالىپ، ءبارى ويداعىداي بولسا، الاكولگە بارىپ دەمالامىز دەپ جوسپارلاپ وتىرمىز.
اينۇر الىپبايەۆا، جەكە كاسىپكەر: ءبىر ساتكە دە ۋاقىت جوق
قىستا ويلاۋشى ەدىم، «وسىدان جاز شىقسا، اندا بارام، مىندا بارام» دەپ. قايداعى... ءقازىردىڭ ءوزىندە جازدىڭ ءبىر ايى ءوتىپ بارادى. جاز – ناعىز ساۋدانىڭ قىزاتىن ۋاقىتى عوي. سوندىقتان ءبىر ساتكە دە ۋاقىت جوق. ونىڭ ۇستىنە ساۋدا ورنىمىزدىڭ كولەمىن ۇلعايتامىز دەپ، قۇرىلىستى دا باستاپ قويدىق. وسى عيماراتتى سالىپ بولساق، ءوز ءونىمىمىزدى وندىرەتىن بولامىز. ءقازىردىڭ وزىندە ءبىزدىڭ كاسىپورىن شىعارىپ جاتقان ونىمدەرگە سۇرانىس جوعارى. مۇمكىن كۇزدە، كۇن سالقىنداعاندا دەمالاتىن بولارمىز.
گۇلنار جۇماباي قىزى، جۋرناليست: «سارىاعاشتاعى» شيپاجايعا بارامىن
ءبىزدىڭ بيىلعى جازعى دەمالىسىمىز قىزۋ قارقىنمەن باستالدى. «قازاقتىڭ تويى بىتپەسىن» دەمەكشى، باتىستاعى قايىن جۇرتتا ءجۇرمىز. وسىنداعى تۋمالاردىڭ تويلارى بولىپ، قۋانىشتارىنا ورتاقتاسىپ جاتقان جايىمىز بار. سوسىن وڭتۇستىككە قاراي ويىسامىز. توركىندە دە ءبىراز قۋانىشتار كۇتىپ تۇر. جىلدا «سارىاعاشتاعى» شيپاجايدا ءبىر مەزگىل دەمالىپ قايتامىن. بيىل دا جازعى دەمالىسىمنىڭ بىر-ەكى اپتاسىن وسىندا وتكىزۋدى جوسپارلاپ وتىرمىن.