UNWTO دۇنيەجۇزىلىك تۋريستىك ۇيىمى قازاقستاندىق ساتى اۋىلىن ۇزدىك تۋريستىك اۋىل دەپ تانىدى. باس اسسامبلەيانىڭ Best tourism Villages by UNWTO 2023 سالتاناتتى ءىس-شاراسى كورشىلەس سامارقاندتا ءوتتى، دەپ حابارلايدى almaty-akshamy.kz
ايتا كەتەيىك، UNWTO - نىڭ «ۇزدىك تۋريستىك اۋىلدار» باعدارلاماسى 2021 جىلى ىسكە قوسىلعان. ول ءتۋريزمدى اۋىلدىق اۋماقتاردىڭ دامۋى مەن ءال-اۋقاتىنىڭ قوزعاۋشى كۇشىنە اينالدىرۋعا باعىتتالعان.
ساتى - «كولساي كولدەرى» ۇلتتىق ساياباعىندا (الماتى وبلىسى) ورنالاسقان، وندا تۋريستىك نىساندار-اتتاس كولدەر توبى جانە قايىڭدى كولى بار. قازىرگى ۋاقىتتا ساتى - قوناق ۇيلەر سانى بويىنشا كوشباسشى، بۇل جەرگىلىكتى تۇرعىنداردىڭ كەلەلى ىسكە بەلسەندى قاتىسۋىنىڭ ناتيجەسى.
سونىمەن قاتار، سوڭعى 5 جىلدا مۇندا ىڭعايلى مارشرۋتتار مەن سەرۋەن جولدارى قۇرىلعان، تومەنگى كولسايعا جول سالىنعان. اۋدان كولەمىندە ادامدار توقتاپ دەم الاتىن كوپتەگەن ورىندىقتار، اربالار مەن ايلاقتار بار. باقىلاۋ نۇكتەسىنەن كول ايدىنىنىڭ پانورامالىق كورىنىسىن تاماشالاۋعا بولادى.
«قازاقستاندا ساتىنىڭ تابىستى تاجىريبەسىن تاراتۋ ماقساتىندا قازاقستاندىق تۋروپەراتورلار مەن باسقا وڭىرلەردەن كەلگەن قوناق ءۇي يەلەرى ءۇشىن اقپاراتتىق تۋرلار، وقىتۋ ترەنينگتەرى مەن سەمينارلار وتكىزىلەدى. 2023 جىلعى ەسەپ بويىنشا ساتىدا 90 قوناق ءۇي مەن 30 ورنالاسۋ ورنى جۇمىس ىستەيدى. بۇل سان 2019 جىلمەن سالىستىرعاندا ەكى ەسە وسكەن. جەرگىلىكتى تۇرعىنداردىڭ كوپشىلىگى تۋريستىك بيزنەسپەن اينالىسادى»، - دەدى تۋريزم جانە سپورت ۆيسە-مينيسترى ەرجان ەركىنبايەۆ.
ايتا كەتەيىك، 2020 جىلى ساتى اۋىلى Lonely Planet حالىقارالىق اگەنتتىگىنىڭ نۇسقاسى بويىنشا جەرگىلىكتى قاۋىمداستىقتارعا نەگىزدەلگەن ءتۋريزمنىڭ ەڭ جاقسى باعىتى رەتىندە تانىلىپ ماراپاتقا يە بولعان.