بۇل تۋرالى پارلامەنتتىك تىڭداۋدا ىشكى ىستەر ءمينيسترىنىڭ ورىنباسارى يگور لەپەحا ايتتى.
بۇل شارا ينتەرنەت-الاياقتىقتىڭ الدىن الۋعا باعىتتالعان، دەپ حابارلايدى Almaty-akshamy.kz
"كوپتەگەن ادامدا "ەگەر بىزدە اۋىستىرىلاتىن نومىرلەردى بۇعاتتاۋ جۇيەسى بولسا، الاياقتار ءبىزدىڭ ازاماتتارىمىزعا شەتەلدەن قالاي قوڭىراۋ شالا الادى" دەگەن سۇراق تۋىنداۋى مۇمكىن. وعان ەكى سەبەپ بار. بىرىنشىدەن، ولار قازاقستاندىق ۇيالى بايلانىس كومپانيالارىنىڭ نومىرلەرىن پايدالانا باستادى. سول باياعى "دروپەرلەر" اقىلى تۇردە ەلەكتروندى SIM-كارتالاردى ءوز اتتارىنا تىركەپ، ونى الاياقتارعا بەرەدى، ولاردىڭ كومەگىمەن قىلمىسكەرلەر WhatsApp قوسىمشاسىندا تىركەلەدى. ونى ىسكە قوسقاننان كەيىن الاياقتار جابىرلەنۋشىلەرگە كورسەتىلگەن مەسسەندجەر ارقىلى قوڭىراۋ شالىپ، سويلەسەدى، ال ولاردىڭ ورنالاسقان جەرىن مۇنداي جاعدايدا انىقتاۋ قيىن بولىپ كەلەدى"، - دەدى يگور لەپەحا.
ۆەدومستۆو وكىلىنىڭ سوزىنشە، وسى كۇنگە دەيىن ابونەنتتىك ءنومىردى باسقا ادامعا زاڭسىز بەرگەنى ءۇشىن جاۋاپكەرشىلىك بولماعان. بۇگىندە بۇل ولقىلىقتىڭ ورنىن تولتىرۋ بويىنشا جۇمىستار جۇرگىزىلىپ جاتىر. ناقتى ايتار بولساق، اكىمشىلىك زاڭناماعا تۇزەتۋلەر ەنگىزۋ قارالۋدا.
"اكىمشىلىك قۇقىق بۇزۋشىلىق تۋرالى كودەكستىڭ 637-بابى وسىنداي ارەكەتتەر ءۇشىن قۇقىقتىق جاۋاپكەرشىلىكتى كوزدەيتىن 18-تارماقپەن تولىقتىرىلادى. سونىمەن قاتار باقىلاۋ شارالارىن كۇشەيتۋ ءۇشىن سيفرلىق دامۋ مينيسترلىگى "بايلانىس قىزمەتتەرىن كورسەتۋ قاعيدالارىنا" تولىقتىرۋلار جوباسىن ازىرلەدى، وعان سايكەس تەلەفون نومىرلەرىن تىركەۋ كەزىندە ازاماتتار "بيومەتريادان" وتۋگە مىندەتتى بولادى. بۇل شارا ازاماتتىق جاۋاپكەرشىلىكتى ارتتىرادى جانە ۇيالى بايلانىس قىزمەتتەرىن پايدالانۋدا ءتارتىپ ورناتۋعا مۇمكىندىك بەرەدى"، - دەپ تولىقتىردى سپيكەر.
ىشكى ىستەر ءمينيسترىنىڭ ورىنباسارى ەكىنشى سەبەپ رەتىندە الاياقتاردىڭ ارنايى IP جانە SIP تەلەفونيا باعدارلامالارىنىڭ مۇمكىندىكتەرىن پايدالانا باستاۋىن ايتتى.
"ولاردى كومپيۋتەرگە نەمەسە تەلەفون قۇرىلعىسىنا ورناتقاننان كەيىن الاياقتار قوسىمشا قولدانبالاردى پايدالانىپ، ءوز ءنومىرىن كەز كەلگەن باسقا نومىرگە اۋىستىرادى، وسىلايشا الاياقتار قوڭىراۋ قابىلداۋشىلاردى الدايدى"، - دەدى يگور لەپەحا.