ساتبايەۆ ۋنيۆەرسيتەتىندە ۋنيۆەرسيتەتتىڭ ۇستازى، ءبىلىم بەرۋ سالاسىنىڭ ۇزدىگى ءتوس بەلگىسىنىڭ يەگەرى، قازاقستان ينجەنەرلىك مەكتەبىنىڭ كورنەكتى وكىلى ءجاميعا ورمانوۆانىڭ قۇرمەتىنە ارنالعان اۋديتوريا اشىلدى، - دەپ حابارلايدى اqshamnews.kz ءتىلشىسى.
سالتاناتتى شاراعا ونىڭ تۋعان-تۋىستارى، ارىپتەستەرى مەن شاكىرتتەرى قاتىستى. اۋديتوريانىڭ اشىلۋ سالتاناتىندا ۋنيۆەرسيتەت رەكتورى مەيرام بەگەنتايەۆ ءسوز سويلەپ، وسى ءىستى جۇزەگە اسىرۋعا اتسالىسقان بارلىق جاندارعا العىس ءبىلدىردى:
"ءجاميعا ورمانوۆا اتىنداعى اۋديتوريانى اشا وتىرىپ، ءبىز ۇرپاقتار ساباقتاستىعىن جالعاستىرامىز، ءارى ءوزىنىڭ ماماندىعىنا دەگەن ادالدىعىمەن ەرەكشەلەنگەن ۇلى تۇلعانى قازىرگى ستۋدەنتتەرگە ۇلگى ەتىپ كورسەتەمىز. وسى اۋديتوريادا ءبىلىم الاتىن ءاربىر ستۋدەنت ءجاميعا ورمانوۆادان ونەگە الىپ، ادامگەرشىلىك پەن ادال ەڭبەككە تالپىنادى دەپ سەنەمىن"، – دەدى رەكتور.
ءجاميعا عالي قىزى ورمانوۆا – تاۋ-كەن ينجەنەرى، ماركشەيدەر، بەلگىلى جازۋشى، جۋرناليست ءارى اۋدارماشى عالي ورمانوۆتىڭ قىزى. ول ءومىرىنىڭ قىرىق جىلدان استام ۋاقىتىن ساتبايەۆ ۋنيۆەرسيتەتىنە ارنادى.
1954 جىلى قازاق تاۋ-كەن مەتاللۋرگيا ينستيتۋتىن اياقتاپ، وسى جەردە اسپيرانتۋرانى دا ءتامامدادى، ءسويتىپ ءوزى وقىعان وقۋ ورنىندا ۇستازدىق ەتۋدى، شاكىرت تاربيەلەۋدى جانە عىلىمي زەرتتەۋمەن شۇعىلدانۋدى ومىرلىك جولى رەتىندە تاڭدادى. ول «گەودەزيا»، «ماركشەيدەرلىك ءىسى»، «تاۋ-كەن جۇمىستارىنىڭ اسەرىنەن جەر قىرتىسىنىڭ جانە جەر بەتىنىڭ ىعىسۋى»، «توپوگرافيالىق جانە ماركشەيدەرلىك سىزۋ» پاندەرىنىڭ بىلىكتى وقىتۋشىسى رەتىندە ستۋدەنتتەردىڭ ەسىندە ساقتالىپ قالدى.
سونىمەن قاتار ءجاميعا ورمانوۆا كافەدرانىڭ عىلىمي-زەرتتەۋ جۇمىستارىنا دا بەلسەنە ارالاسىپ، قاراعاندى كومىر باسسەينى مەن تەكەلى قورعاسىن-مىرىش كومبيناتىنداعى جەر قىرتىسىنىڭ ىعىسۋ ۇدەرىستەرىن زەرتتەدى. ونىڭ كوپجىلدىق جۇمىسىنىڭ ناتيجەسى رەتىندە 30-دان استام عىلىمي ەڭبەگى جارىق كوردى.
الايدا ونىڭ ەڭ باستى قاسيەتى – ستۋدەنتتەردىڭ بويىندا عىلىم مەن ماماندىققا دەگەن قىزىعۋشىلىقتى وياتا ءبىلۋى ەدى. ونىڭ شاكىرتتەرى سۇيىكتى ۇستازدارىن ەشقاشان ۇمىتقان ەمەس، ۇنەمى حال-جاعدايىن ءبىلىپ، قوناققا كەلىپ، تۇلەكتەر كەزدەسۋلەرىنە شاقىرىپ ءجۇردى.
شاراعا قازاقستاننىڭ ەڭبەك سىڭىرگەن قايراتكەرى، ق ر ۇلتتىق جاراتىلىستانۋ عىلىمدارى اكادەمياسىنىڭ اكادەميگى ۇلىقپان سىدىقوۆ، تەحنيكالىق عىلىمدار دوكتورى، پروفەسسور نۇرپەيىسوۆا مارجان، جازۋشى، حالىقارالىق الاش سىيلىعىنىڭ يەگەرى ماعيرا قوجاحمەتوۆا، جيەن نەمەرەسى ايدار قىرىقباي ۇلى جانە پروفەسسور، شاكىرتتەرى قاتىستى.
سوندىقتان دا ءجاميعا عالي قىزى اتىنداعى اۋديتوريانىڭ اشىلۋى بۇكىل ۋنيۆەرسيتەت ءۇشىن ماڭىزدى وقيعا بولماق