قاراعاندىدا قازاقستان تاۋەلسىزدىگىنىڭ 30 جىلدىعىنا ارنالعان فەستيۆال قورىتىندىلاندى
ۇلتتىق مادەنيەت پەن قولونەردى ساقتاۋعا باعىتتالعان ءىس-شارا جازدا باستالعان. وعان بارلىعى 125 قولونەرشى مەن ءتۇرلى شىعارماشىلىق ۇجىم قاتىستى، دەپ حابارلايدى Almaty-akshamy.kz.
قاتىسۋشىلار قاتارىندا ازامات باقيا دا بار. شەبەر فەستيۆالگە «كەرنەي» ۇرمەلى اسپابىن اكەلگەن. ول جورىقتا جاۋىنگەرلەردىڭ جىگەرىن قايراۋ ءۇشىن قولدانىلعان كورىنەدى.
«الپامىس باتىر جىرىندا «كەرنەي سىرناي تارتقىزىپ، بەدەلىن جۇرتقا ارتقىزىپ» دەگەن جولدار كەزدەسەدى. بۇل اسپاپ – قازاقتىڭ ءتول اسپابى. كەيىننەن جوعالىپ كەتكەن. قازىرگى تاڭدا ءبىز سونى جاڭعىرتىپ، جاساپ ءجۇرمىز. كەرنەي – وسىنداي ءىس-شارادا، سالتاناتتى جيىنداردا تاپتىرماس اسپاپ»، - دەيدى ونەرپاز ازامات بالقيا.
فەستيۆالدە گۇلبارشىن ماتنيازوۆا دا ءوز جۇمىستارىن كوپشىلىك نازارىنا ۇسىندى. 15 جىل بويى كيىزدەن كيىم جاسايتىن ەلگە تانىمال قولونەر شەبەرى، ونىمدەرىن شەتەلگە شىعارا باستاعان.
«جاقىندا تاپسىرىس بويىنشا دجەميلي اتتى اقش-تىق ارتىسكە كويلەك تىكتىم. ءقازىر ديماش قۇدايبەرگەننىڭ اندەرىن ورىندايتىن فابيو ەسىمدى يتاليالىق ونەرپازعا ۇلتتىق كيىم دايىنداۋ ۇستىندەمىن. سوڭعى كەزدەرى شەتەلدىكتەر قازاقتىڭ كيىزىنەن جاسالاتىن كيىمگە تاپسىرىس بەرۋدە»، - قولونەر شەبەرى گۇلبارشىن ماتنيازوۆا.
فەستيۆال ۇيىمداستىرۋشىلارى شەبەرلەردى ءداستۇرلى تۇردە ءار 2 جىل سايىن جيناۋدى جوسپارلاپ وتىرعانىن اتاپ وتكەن ءجون.