ۇلتتىق ۇلاننىڭ الماتى قالاسىندا ورنالاسقان 3650 اسكەري ءبولىمىنىڭ ساربازدارىنا ەلىمىزدىڭ جوعارعى وقۋ ورىندارىنا تۇسۋگە ارنالعان تەگىن ءبىلىم گرانتتارىنىڭ ارنايى سەرتيفيكاتى تابىستالدى.
تەگىن ءبىلىم الۋعا مۇمكىندىك بەرەتىن گرانتتار جاۋىنگەرلىك قىزمەت جانە جاۋىنگەرلىك دايىندىق بارىسىندا ەرەكشە كوزگە تۇسكەن ساربازدارعا بەرىلگەن.
– ۇلتتىق ۇلاننىڭ 3650 اسكەري بولىمىندە ءار ەر ازاماتتىڭ مىندەتى بولىلىپ تابىلاتىن وتان الدىنداعى پارىزىمدى اتقارىپ ءجۇرمىن. اسكەرگە كەلىپ، ارمانداعان جوعارعى وقۋ ورنىنا تۇسۋگە مۇمكىندىك الىپ وتىرمىن. بولاشاعىما جول اشقان، وتان قورعاۋشى رەتىندە قالىپتاسۋىما كومەكتەسىپ، تاجىريبەسىمەن بولىسكەن كومانديرلەرىمە ەرەكشە العىس بىلدىرەمىن، – دەيدى گرانت يەگەرى تولەندى قالمۇحامبەت.
ول ەلىمىزدەگى بەدەلدى وقۋ ورداسىنىڭ ءبىرى – ءال-فارابي اتىنداعى قازاق ۇلتتىق ۋنيۆەرسيتەتىنە وقۋعا ءتۇسۋدى جوسپارلاپ وتىر. ايتا كەتەيىك، مۇنداي گرانتقا قول جەتكىزگەن ساربازدار ەندى ەلىمىزدەگى تاڭداۋلى وقۋ ورىندارىنا ۇلتتىق ءبىرىڭعاي تەستىلەۋدەن وتپەي-اق تۇسە الادى.
– جاس سارباز اسكەر قاتارىنا كەلگەندە ءوزىنىڭ قاي وقۋ ورنىنا تۇسكىسى كەلەتىنىن كورسەتىپ بايانات جازادى. ءبىز ونى «سروچنيك 2.0» سيفرلىق پلاتفورمادا كورسەتەمىز. بۇل سەرتيفيكات ناقتى ماماندىققا بەرىلمەيدى. ەرتەڭ ۇيىنە جەتكەننەن كەيىن قانداي ماماندىق بار، وزدەرى تاڭداۋ جاسايدى. شەكتەۋ جوق، – دەيدى ءبولىم كومانديرىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى پودپولكوۆنيك فاحريتدين ابدراحمانوۆ.
ساربازدارعا بەرىلەتىن سەرتيفيكات ەكى جىلعا دەيىن جارامدى. وسى ۋاقىت ىشىندە تالاپكەر تاڭداعان جوعارعى وقۋ ورنىنا بارىپ تىركەلۋى ءتيىس. ولارعا شاكىرتاقى تولەنىپ، جاتاقحانادان ورىن دا بەرىلەدى.