ۆاسيليي جيروۆ الماتىدا ۇلتتىق ۇلان ساربازدارىمەن كەزدەستى
قۇقىقتىق ءتارتىپ اسكەرىندە ساربازداردىڭ قوعام قايراتكەرلەرىمەن، بەلگىلى تۇلعالارمەن، اتاقتى سپروتشىلارمەن كەزدەسۋى داستۇرگە اينالعان. الماتىداعى «وڭتۇستىك» وڭىرلىك قولباسشىلىعىنداعى ۇلاندىق جاۋىنگەرلەر بۇل جولى تاۋەلسىز قازاقستاننىڭ العاشقى وليمپيادا چەمپيوندارىنىڭ ءبىرى – بالقاش بارىسى ۆاسيليي جيروۆپەن جۇزدەستى.
1996 جىلعى اتلانتا وليمپياداسىنىڭ چەمپيونىمەن كەزدەسۋ 5571 اسكەري بولىمىندە ءوتتى. وعان 300-دەن اسا سارباز قاتىستى.
بالقاش جولبارىسى بيىك بەلەستەردى باعىندىرۋ جولىندا تالاي كەدەرگىلەر مەن قيىندىقتارعا تاپ بولعانىن، تەك ەرەن ەڭبەكتىڭ ارقاسىندا ءبارىن ەڭسەرە بىلگەنىن اسەرلى اڭگىمەلەدى. بيىك ارماندارعا جەتۋ جولدارىمەن ءبولىسىپ، سالاۋاتتى ءومىر سالتىن ۇستانۋعا دا شاقىردى. ساربازدار تاراپىنان قويىلعان ساۋالدار دا جاۋاپسىز قالمادى. وليمپيادا چەمپيونى ۇلاندىق ساربازدارعا ءوزىنىڭ قولتاڭباسى قويىلعان بوكسەرلىك قولعابى مەن فوتوسۋرەتتەرىن ەستەلىككە تارتۋ ەتتى.
– جيروۆتىڭ اڭگىمەسىن زەيىن قويىپ تىڭداعان ساربازدار ەرەكشە رۋحتانىپ، بۇل كەزدەسۋدەن ۇلكەن اسەر العانىنا سەنىمدىمىن. ۆاسيليي جيروۆ – حالقىمىزدىڭ ماقتانىشى، ءوزىنىڭ ەڭبەگىمەن جانە تاباندىلىعىمەن الەمنىڭ سپورت ارەناسىندا قازاقستان تۋىن جەلبىرەتكەن سپورتشى. ۆەل باركەر كۋبوگىنىڭ يەگەرىن شاقىرۋداعى ماقساتىمىز – ساربازدار اراسىندا سالاۋاتتى ءومىر سالتىن ناسيحاتتاۋ. بولاشاقتا شىڭ باسىنا شىققىسى كەلەتىن ساربازدارعا اعا بۋىن وكىلدەرىنىڭ وسىنداي اقىل-كەڭەسى ەشقاشان ارتىق ەتپەيدى. كەرەگىن ءتۇرتىپ الىپ، قاجەتىنە جاراتادى. سوندىقتان ءبىز بۇل يگى ءداستۇردى جالعاستىرا بەرەمىز، – دەيدى «وڭتۇستىك» وڭىرلىك قولباسشىلىعى تاربيە جانە الەۋمەتتىك-قۇقىقتىق جۇمىستار باسقارماسىنىڭ باستىعى پودپولكوۆنيك ارمان سەيىتوۆ.
كەزدەسۋ سوڭىندا چەمپيون ساربازدارمەن ەستەلىك فوتوعا ءتۇستى.