ۇلتتىق يادرولىق ورتالىقتىڭ باس ينجەنەرى ورىنباسارى دەنيس زارۆانىڭ ايتۋىنشا، اتومدىق رەاكتورلار سىرتقى جانە ىشكى اسەرلەرگە بارىنشا تۇراقتى.
ولار قاۋىپسىزدىك دەڭگەيلەرىمەن — بەلسەندى جانە ءپاسسيۆتى جۇيەلەرمەن جابدىقتالعان، رەاكتور قالىپتى جۇمىس رەجيمىنەن شىققان جاعدايدا، جۇيە ونى وڭتايلى كۇيگە قايتارادى، دەپ حابارلايدى aqshamnews.kz.
دەنيس زارۆا: "قازىرگى ۋاقىتتا الەمدە كەڭىنەن قولدانىسقا ەنگەن جانە قازاقستاندا دا سالۋ جوسپارلانىپ وتىرعان 3+ بۋىن رەاكتورلارى ماكسيمالدى ءقاۋىپسىز بولىپ سانالادى جانە بۇعان دەيىنگى بارلىق جاعىمسىز تاجىريبەنى ەسكەرگەن. اۋىر اپاتتىڭ پايدا بولۋ ىقتيمالدىعى ەسەپتەلگەندە، ءبىز ءجيى 10^(-7) ءمانىن اتاپ وتەمىز. بۇل دەگەنىمىز، مۇنداي اپاتتىڭ ىقتيمالدىعى 10 ميلليون جىلدا ءبىر رەت بولادى دەگەن ءسوز، ال رەاكتورلاردىڭ قىزمەت مەرزىمى 60-80 جىلدى قۇرايدى."
اتوم ەنەرگەتيكاسى — تەك ەنەرگيا كوزى عانا ەمەس، قاۋىپسىزدىك پەن ۇزاقمەرزىمدى تۇراقتىلىقتى قامتاماسىز ەتەتىن ءتيىمدى شەشىم.