الماتىدا «حالىق قاتىساتىن بيۋدجەت» قالالىق باعدارلاماسى بويىنشا مەگاپوليس تۇرعىندارىنان 6118 ءوتىنىش تۇسكەن، دەپ حابارلايدى aqshamnews.kz
وتىنىشتەر ءماسليحات دەپۋتاتتارىنىڭ، قوعامداستىق وكىلدەرىنىڭ، قۇرىلىس جانە اباتتاندىرۋ سالاسى ماماندارىنىڭ قاتىسۋىمەن ءار اۋدان اكىمدىگى جانىنان قۇرىلعان ساراپتامالىق كەڭەستەردە ساراپتالدى.
ساراپشىلار كەلىپ تۇسكەن وتىنىمدەردى بەلگىلەنگەن ساناتتار بويىنشا «حالىق قاتىساتىن بيۋدجەت» باعدارلاماسىنىڭ تالاپتارى مەن ولشەمشارتتارىنا سايكەستىگىنە، نوبايى مەن بولجالدى سمەتاسىنىڭ بولۋىنا باعا بەردى. ەندى ءاربىر ءوتىنىم ءۇش مارتەبەنىڭ ءبىرىن الادى: «داۋىس بەرۋگە جىبەرىلدى»، «قايتا قاراۋعا جىبەرىلدى» نەمەسە «قابىلدانبادى». «حالىق قاتىساتىن بيۋدجەتتىڭ» بارلىق ەرەجەلەرىنە سايكەس بەرىلگەن وتىنىمدەر ماقۇلدانادى جانە داۋىس بەرۋ كەزەڭىنە جىبەرىلەدى.
قايتا قاراۋعا جىبەرىلگەن ۇسىنىستاردىڭ اۆتورلارى اعىمداعى جىلدىڭ 10 قازانى مەن 14 قازانىن قوسا العاندا، ءوز جوبالارىن تۇزەتىپ، قايتا قاراۋعا وتىنىمدەر بەرۋ مۇمكىندىگىنە يە بولادى.
اۆتورلار budget.open-almaty.kz ينتەرنەت-پورتالىندا تىركەلۋ كەزىندە كورسەتكەن ەلەكتروندىق پوشتا مەكەن-جايىنا ءوتىنىمدى پىسىقتاۋ قاجەتتىلىگى تۋرالى حابارلاما الادى. داۋىس بەرۋگە جىبەرىلگەن جوبالار «جوبالار» بەتىندە «مارتەبە» سۇزگىسى ارقىلى جاريالانادى.
«حالىق قاتىساتىن بيۋدجەت» باعدارلاماسى بويىنشا كەڭەس نەمەسە اقپاراتتى اۋدان اكىمدىكتەرىنەن، سونداي-اق Open Almaty الماتى قالاسى اكىمدىگىنىڭ قوعامدىق قابىلداۋىنان 224-39-29 (ىشكى 203) تەلەفونى ارقىلى الۋعا بولادى.