ەلدە تەلەديدار باعاسى تومەندەدى.
ساۋدا نارىعىندا مۇنداي وزگەرىس كەيىنگى ءۇش جىلدا العاش بايقالىپ وتىر، دەپ حابارلايدى aqhsmnews.kz 24.kz-كە سىلتەمە جاساپ.
تەحنيكانىڭ ارزانداۋىنا نە سەبەپ؟ حالىقتىڭ سۇرانىسى "كوك جاشىككە" شىنىمەن ازايىپ بارا ما؟ ۇلتتىق ستاتيستيكا بيۋروسىنىڭ اقپاراتىنا سەنسەك، وسى قىركۇيەكتە تەلەديدار باعاسى كۇرت ءتۇسىپ كەتكەن.
2021 جىلدان بەرى العاش رەت 15%-كە جۋىق تومەندەپتى. كەيىنگى 3 جىل ءۇشىن بۇل – رەكوردتىق كورسەتكىش. سەبەبى وسى كوكتەمدە عانا ۇلتتىق بيۋرونىڭ ەسەبى بويىنشا تەلەديدار باعاسى 26،9%-كە، ال كەيىنگى ءبىر جىلدا، ياعني 2023 جىلعى قىركۇيەكتە باعانىڭ 39 پايىزعا دەيىن وسكەنى بايقالعان. باعاداعى مۇنداي وزگەرىستى تەحنيكا ساتاتىن ارنايى دۇكەن قىزمەتكەرلەرى سۇرانىستىڭ ازايۋى دەپ ءتۇسىندىردى.
تەحنيكاعا سۇرانىستىڭ ازايعانى بايقالادى. حالىقتىڭ كوپشىلىگى: «ۇيدە تەلەديدار كورەسىز بە؟» دەگەن سۇراققا «جوق» دەپ جاۋاپ بەردى. ءيا، تەلەديدارعا سۇرانىس ازايدى دەسەك تە، تەلەونىمگە قىزىعۋشىلىق تومەندەي قويماعان. سەبەبى ونى تاماشالايتىن تەحنيكا ءتۇرى اۋىستى دەگەن دۇرىسىراق. ءقازىر بارلىعى قالتادا ۇستايتىن سمارتفوندى سەرىك ەتىپ كەتكەن جوق پا؟ كەرەگىن سودان تاۋىپ، كەز كەلگەن جەردە كورە بەرەدى.