5،5 ميلليوننان استام ادامعا مىندەتتى نەمەسە ۇسىنىلعان ەۆاكۋاسيا تۋرالى حابارلامالار جىبەرىلگەن
اقش-تىڭ فلوريدا شتاتىنىڭ گۋبەرناتورى رون دەسانتيس جاقىنداپ كەلە جاتقان «ميلتون» داۋىلىنا بايلانىستى شتات تۇرعىندارىن دەرەۋ ەۆاكۋاسيالاۋعا شاقىردى، دەپ حابارلايدى aqshamnews.kz.
اقش-تىڭ توتەنشە جاعدايلاردى باسقارۋ جونىندەگى فەدەرالدىق اگەنتتىگىنىڭ مالىمەتى بويىنشا، 5،5 ميلليوننان استام ادامعا مىندەتتى نەمەسە ۇسىنىلعان ەۆاكۋاسيا تۋرالى حابارلامالار جىبەرىلگەن. بۇل – فلوريدا تاريحىنداعى ەڭ ۇلكەن ەۆاكۋاسيا.
"ەگەر كەتكىڭىز كەلسە، ءقازىر كەتىڭىز"، – دەدى گۋبەرناتور باسپا ءسوز ءماسليحاتىندا.
ول پرەزيدەنت دجو بايدەننىڭ شتات بيلىگى ۇسىنعان بارلىق شارالاردى قولدايتىنىن جانە سۋ تاسقىنىنىڭ سالدارىمەن كۇرەسۋگە اقش ۇلتتىق گۆاردياسىنىڭ 8 مىڭعا جۋىق قىزمەتكەرى جۇمىلدىرىلاتىنىن حابارلادى.
«ميلتون» مەكسيكا شىعاناعىندا 2005 جىلدان بەرى بايقالعان ەڭ كۇشتى داۋىل ەكەنى اتاپ ءوتىلدى. بۇگىن، 9 قازاندا ول 3،3 ميلليوننان استام ادام تۇراتىن تامپا-بەيگە جەتەدى دەپ كۇتىلۋدە. سينوپتيكتەر داۋىلدىڭ قاي جەردە بولاتىنىن ءالى انىقتاعان جوق. كەشە، 8 قازاندا ميلتوندى اقش-تىڭ ۇلتتىق داۋىل ورتالىعى (NHC) ونى 5-ساناتتاعى داۋىل دەپ راستادى.
NHC مالىمەتتەرى بويىنشا، تايفۋن ساعاتىنا 14،5 كم جىلدامدىقپەن قوزعالادى جانە جەلدىڭ جىلدامدىعى ساعاتىنا 287 كم-گە دەيىن جەتەدى. داۋىلدىڭ فلوريداعا جاقىنداۋىنا بايلانىستى 1500-دەن استام رەيس توقتاتىلدى. ميلتونعا ارنالعان ەسكەرتۋلەر شتاتتا 277 ادامنىڭ ءومىرىن قيعان «حەلەن» داۋىلىنان ءبىر اپتادان كەيىن كەلدى.