نەمەسە بىزگە ءتان بەيقامدىق
COVID - 19 كەسەلىنىڭ بەتى قايتار ءتۇرى جوق. قايتا ۇدەپ بارا جاتقانداي. ستاتيستيكا دا كوڭىل كونشىتپەيدى. ەكى كۇن بۇرىن اۋرۋ جۇقتىرعاندار سانى انتيرەكورد جاساپ 103 بولدى دەپ ەدى، بۇگىن 130 دان اسىپتى. الماتىدا. ءبىز سوندا دا بەيقامبىز. بۇكىل الەم بارىن سالىپ كۇرەسىپ جاتىر بۇل ىندەتپەن. ال ءبىزدىڭ قولىمىز توي-تومالاقتان بوساماي جاتىر. ونىمەن قويماي الەۋمەتتىك جەلىدە «ۇشاقپەن ۋ شاشىپ جاتىر..» «ەكپەدەن كەيىن ەكى-اق جىل ءومىر قالادى ەكەن..» دەگەن بايبالام شىعىپ جاتىر. بۇل قالاي؟.
بەيقامدىق بىزگە عانا ءتان بە دەيمىن. ەڭ جاقىن جاندارىمىز باقيلىق بولماي، سەنبەيمىز عوي تاعى. كىمنەن سۇراساڭ دا، بىرەۋىنىڭ جاقىن تۋىسى، بىرەۋىنىڭ سىنىپتاسى، ەندى بىرەۋىنىڭ قىزمەتتەسى نەمەسە كۋرستاسى كەتكەن. ەندى ەكپە الدىڭ با دەسەڭ، ءازىر اۋىرماعانىن ايتادى تاعى. اۋ، ەكپە دەگەن سول اۋرۋدىڭ الدىن الۋ ەمەس پە؟ ءبىزدىڭ حالىقتىڭ اسىقپايتىنىن ماماندار دا ايتىپ وتىر.
الاتاۋ اۋدانىنداعى N29 قالالىق ەمحانانىڭ مەدبيكەسى ايگۇل.س:
- جاز ايىنان قالادا جاپپاي تەگىن ەكپە سالۋ باستالدى. ءبىزدىڭ ەمحاناعا دا ۆاكسينانىڭ ءتورت ءتۇرى ءبولىنىپ، تۇرعىنداردىڭ ەكپە الۋىنا بار مۇمكىندىك جاسالدى. ۋچاسكەلىك دارىگەرلەر ءوز ۋچاسكەسىنىڭ تۇرعىندارىمەن تۇسىندىرمە جۇمىستارىن جۇرگىزدى. نەگىزى، ەكپە جاساتۋ ازاماتتاردىڭ ءوز قالاۋىنشا، ماجبۇرلەۋ جوق. ءبىر بايقاعانىم، وزگە ۇلتتار ەمحاناعا كەلىپ، كەڭەس الىپ، ۆاكسينا تاڭداپ، كوزى جەتكەندەرى ەكپە جاساتىپ جاتسا، ءبىزدىڭ قانداستار جۇمىستان تالاپ ەتىپ جاتىر، جول ءجۇرۋ كەرەك ەدى دەپ كەلەدى.
مىنە، وسىلاي. اششى دا بولسا شىندىق. دامىپ كەتكەن، العا ۇزاپ كەتكەن ەلدەر ايقايلاپ ايتىپ جاتىر. عالامدىق ىندەتتىڭ بەتىن قايتارۋ ۆاكسيناسيا دەپ. ۆاكسيناسيا جانە ساقتىق شارالارى دەپ. «ساقتانساڭ، ساقتارمىن» دەگەن دە بار. ساقتانايىق. سول ەكپە مەن ساقتىقتان باسقا تىعىرىقتان شىعار جول كورىنبەيدى.