ساق قىزى راحيتپەن اۋىرعانى انىقتالدى

ول مال شارۋاشىلىعىمەن اينالىساتىن حالىقتان شىققان

رەسەي عىلىم اكادەمياسىنا قاراستى ماتەريالدىق مادەنيەت تاريحى ينستيتۋتىنىڭ عالىمدارى ساق قىزىندا D دارۋمەنى جەتىسپەۋشىلىگى بولعانىن مالىمدەدى، دەپ حابارلايدى Almaty-akshamy.kz.

عالىمداردىڭ مالىمەتىنشە، سكيف قىزى كونە تەمىر داۋىرىندە ءومىر سۇرگەن. زەرتتەۋشىلەر بالانىڭ مۋميالانعان قالدىقتارىن ميكروفوكۋستى رەنتگەنوگرافيانىڭ كومەگىمەن زەرتتەپ شىققان. باستاپقىدا قاڭقا سۇيەك ءجاسوسپىرىم ۇل بالاعا تيەسىلى دەپ سانالعان، ويتكەنى ونىڭ جانىنان جەبەسى بار ساداق پەن پىشاق تابىلعان. دنك تالداماسى مەن باس سۇيەگىنىڭ سۋرەتتەرى بۇل جەتى جاستاعى قىز بالا ەكەنىن كورسەتىپتى. ول مال شارۋاشىلىعىمەن اينالىساتىن حالىقتان شىققان ءارى قول ەڭبەگىن جاساپ، اتقا ەرتە جاستان وتىرعان.

سونداي-اق عالىمدار سۇيەكتى زەرتتەي كەلە بالا ولەر الدىندا سىرقاتتانىپ، اشتىق كورگەنىن انىقتاپتى. وعان قوسا راحيت اۋرۋىنىڭ بەلگىلەرى انىقتالعان، D دارۋمەنى جەتىسپەۋشىلىگىنەن سۇيەكتەردىڭ سىنعىشتىعى مەن دەفورماسياسى جوعارىلاعان. قىز نەگىزىنەن وسىمدىك تاعامدارىن جەپ، ەت پەن ءسۇتتى تۇتىنباعان. الايدا، تاعامنىڭ جەتىسپەۋشىلىگى ونىڭ كەدەي وتباسىدان شىققانىن بىلدىرمەيدى، دەيدى عالىمدار، بۇل ونىڭ جاسىنا نەمەسە جىنىسىنا بايلانىستى بولۋى مۇمكىن.