الماتىدا كوپقاباتتى تۇرعىن ءۇي ورتەنىپ، تۇرعىندار ءقاۋىپسىز جەرگە كوشىرىلدى

ءورت كەزىندە 120 ادام ەۆاكۋاسيالانعان

11 جەلتوقساندا ساعات 23:58-دە المالى اۋدانى، برۋسيلوۆ كوشەسى بويىنداعى «التىن بۇلاق-2» تۇرعىن ءۇي كەشەنى ورتكە وراندى، دەپ حابارلايدى Almaty-akshamy.kz.

ءورت سوندىرۋشىلەر كەلگەن ساتتە «التىن بۇلاق-2» تۇرعىن ءۇي كەشەنىنىڭ 6-7 قاباتىنداعى ەكى بلوك، سونداي-اق 17-18ء-شى قابات جانىپ جاتقان.
الماتى قالاسىنىڭ توتەنشە جاعدايلار دەپارتامەنتى ورتەنىپ جاتقان تۇرعىن ءۇي كەشەنىنەن ادامدار ەۆاكۋاسيالانىپ، كەيىن ءورت تولىقتاي سوندىرىلگەنىن حابارلادى.

 «ءتىلسىز جاۋدى اۋىزدىقتاۋعا 70-تەن استام قىزمەتكەر مەن 18 تەحنيكا جۇمىلدىرىلدى. ەۆاكۋاسيا جۇرگىزىلدى. سول جەردە تۇرعان جەكە كولىكتەردىڭ كوپ بولۋى ءورت ءسوندىرۋ تەحنيكاسىنا كەدەرگى بولعانىنا قاراماستان، ءورت باسپالداقتارى قويىلدى، ادامداردى قۇتقارۋ جانە ەۆاكۋاسيالاۋ ءۇشىن اكتپ-54 اۆتوماتتى تەلەسكوپتىق توپسالى كوتەرگىش پايدالانىلدى»، - دەپ حابارلادى ۆەدومستۆودان.

وقيعا ورنىندا جەدەل شتاب قۇرىلىپ، گاز-تۇتىننەن قورعاۋ قىزمەتىنىڭ بولىمشەلەرى شىعىس جانە باتىس جاعىندا ورنالاستىرىلعان. ءورتتى ءسوندىرۋ كەزىندە 120-دان استام ادام ەۆاكۋاسيالانىپ، 20 ادام قۇتقارىلعان.  

ۆەدومستۆونىڭ باسپا ءسوز قىزمەتى ءورتتىڭ 01:10-دا وقشاۋلانعانىن ءمالىم ەتتى.