ساپاسىز ءبىلىم بەرگەن ۋنيۆەرسيتەتتەردى قاتاڭ رەتتەۋ ءپرينسيپى قولدانىلماق

بۇل تۋرالى ق ر عىلىم جانە جوعارى ءبىلىم ءمينيسترى ساياسات نۇربەك ايتتى.

ۆەدومستۆونىڭ كەڭەيتىلگەن القا ماجىلىسىنەن كەيىن ب ا ق وكىلدەرىنىڭ ساۋالىنا جاۋاپ بەرگەن مينيستر جوعارى وقۋ ورىندارى ليسەنزياسىنان تەك سوتتىڭ شەشىمەن ايىرىلاتىنىن قاداپ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

ال، كونستيتۋسياعا سايكەس، ۇكىمەت تە، اتقارۋشى بيلىك تە سوتتىڭ شەشىمىن وزگەرتە المايدى.

«16 جوعارى وقۋ ورنى ليسەنزياسىنان ايىرىلدى. بيىل 15 ۋنيۆەرسيتەت تەكسەرۋدە تۇر. الايدا 2023 جىلدان باستاپ جوعارى وقۋ ورىندارىن مەملەكەتتىك باقىلاۋ مودەلى وزگەرەدى. وسىلايشا، جاڭا رەتتەۋ ساياساتى ەنگىزىلەدى. ءبىز بۇل ماسەلەنى مۇقيات قاراستىرامىز. ۋنيۆەرسيتەتتى بۇرىنعىداي تەز جابۋعا مۇمكىندىك بولمايدى. سەبەبى، زاڭداعى پرينسيپ وزگەرەدى. ءبىراق، بۇل جۇمىستى جالعاستىرامىز. پرەزيدەنت ناقتى تاپسىرمالار بەردى. وعان قاتىستى ساياسات وزگەرگەن جوق. ساپاسىز ءبىلىم بەرگەن جوعارى وقۋ ورىندارىن قاتاڭ رەتتەۋ ءپرينسيپى قولدانىلادى»، - دەدى ساياسات نۇربەك.

ايتا كەتەرلىگى، عىلىم جانە جوعارى ءبىلىم مينيسترلىگىنىڭ مالىمەتىنشە، بۇگىندە بەس جەكە ۋنيۆەرسيتەتكە قاتىستى سوت پروسەسى ءجۇرىپ جاتىر.