ەلجان ءبىرتانوۆتىڭ اپەللياسيالىق سوتى تاعى كەيىنگە شەگەرىلدى

استانادا اپەللياسيالىق سوت ءوتتى.

قازاقستاننىڭ بۇرىنعى دەنساۋلىق ساقتاۋ ءمينيسترى ەلجان ءبىرتانوۆ پەن ونىڭ بۇرىنعى ورىنباسارى ولجاس ابىشيەۆتىڭ ۇستىنەن قوزعالعان اپپەلياسيالىق سوت تاعى كەيىنگە قالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

بۇگىن استانا قالاسى سارىارقا اۋداندىق №2 سوتىندا بۇرىنعى دەنساۋلىق ساقتاۋ ءمينيسترى ەلجان ءبىرتانوۆ پەن ونىڭ بۇرىنعى ورىنباسارى ولجاس ابىشيەۆتىڭ ءىسى بويىنشا اپەللياسيالىق سوت ءوتتى.

ZOOM پلاتفورماسى ارقىلى وتكەن سوت وتىرىسى ۇزاققا سوزىلمادى.

«ەلجان امانتاي ۇلى ءالى اۋىرىپ جاتىر. ەمدەلۋ مەرزىمىن كەلەسى دۇيسەنبىگە دەيىن ۇزارتتى. سوندىقتان اپەللياسيالىق سوت وتىرىسىن كەيىنگە قالدىرۋدى سۇرايمىز»، - دەدى ە.ءبىرتانوۆتىڭ ادۆوكاتى سەرىك ساعالييەۆ.

ءوز كەزەگىندە ءىستى قاراۋدى كەيىنگە شەگەرۋدى سوتتالۋشى ولجاس ابىشيەۆ پەن بۇرىنعى ءمينيستردىڭ قورعاۋشىسى ەسجان ءبىرتانوۆ تا قولدادى.

«كەلەسى سوت وتىرىسى 10 قاڭتار ساعات 10:00-گە بەلگىلەندى. سوت وتىرىسى وفلاين فورماتتا جانە اشىق وتەدى»، - دەدى سۋديا ايبەك امىرعالييەۆ.

ەسكە سالا كەتەيىك، ەلجان ءبىرتانوۆ 2020 جىلدىڭ 3 قاراشاسىندا بيۋدجەت قاراجاتىن ىسىراپ ەتتى دەگەن كۇدىكپەن قاماۋعا الىنعان بولاتىن.

بىلتىر قاڭتاردا ەلجان ءبىرتانوۆتىڭ ۇستىنەن قوزعالعان قىلمىستىق ءىس سوتقا ءتۇستى.

2022 جىلى 28 قازاندا استانا قالاسى سارىارقا اۋدانىنىڭ №2 سوتى بۇرىنعى دەنساۋلىق ساقتاۋ ءمينيسترى ەلجان ءبىرتانوۆ پەن ونىڭ ورىنباسارى ولجاس ابىشيەۆتىڭ ىسىنە قاتىستى ۇكىم شىعاردى.

بۇرىنعى مينيستر سوت شەشىمىمەن كەلىسپەيتىنىن ايتىپ، شاعىم تۇسىرەتىنىن مالىمدەگەن بولاتىن.

ەلجان ءبىرتانوۆتىڭ اپەللياسيالىق سوتى مۇنىڭ الدىندا دا ءبىر مارتە اۋىستىرىلعان ەدى.