ساپار بارىسىندا قۇجات جوعالتۋ – ساياحاتشىلار ءۇشىن ەڭ جاعىمسىز جاعدايلاردىڭ ءبىرى. ءتىپتى ەڭ اباي ساياحاتشىلار دا وزدەرىنىڭ جەكە كۋالىگى نەمەسە ءتولقۇجاتىن توسىن جەردە جوعالتۋى مۇمكىن. مۇنداي جاعدايدا نە ىستەۋ كەرەك؟
ىشكى رەيستەر
استانا اۋەجايىنىڭ باسپا ءسوز قىزمەتى ىشكى رەيستەردە شەشىم بار ەكەنىن ايتتى.
"ساياحاتشى eGov mobile قوسىمشاسى ارقىلى سيفرلىق جەكە كۋالىكتى پايدالانا الادى. بۇل مالىمەتتەر رەسمي تۇردە مويىندالادى جانە اۋەكومپانيالار تىركەۋ مەن ۇشۋعا وتىرعىزۋ كەزىندە قابىلدايدى"، – دەلىنگەن حابارلامادا.
ياعني، ەگەر قۇجات جوعالسا دا، تەلەفونداعى سيفرلىق قۇجات ەل ىشىندە ۇشۋعا كەدەرگى بولمايدى.
حالىقارالىق رەيستەر
شەتەلگە ساپارعا شىعايىن دەپ جاتقاندا جوعالتساڭىز، جاعداي كۇردەلىرەك بولادى. كوپ باعىتتا شەتەل ءتولقۇجاتى – شەكارانى كەسىپ وتۋگە مۇمكىندىك بەرەتىن جالعىز قۇجات.
"كەي جاعدايلاردا جارامدى ۆيزا دا قاجەت. ءتولقۇجاتى بولماسا، ساياحاتشى رەيسكە جىبەرىلمەيدى، سەبەبى مەملەكەتتىك شەكارانى كەسىپ ءوتۋ مۇمكىن ەمەس. سونىمەن قاتار، تاعايىندالعان ەل دە پاسپورتى مەن ۆيزاسى جوق ادامدى قابىلدامايدى"، – دەپ ءتۇسىندىردى استانا اۋەجايىنىڭ وكىلدەرى.
رەسەي مەن قىرعىزستانعا ۇشۋ كەزىندە قازاقستاندىقتار جەكە كۋالىكتى پايدالانا الادى. جاقىندا ارمەنياعا ۇشۋ ءۇشىن دە وسىنداي مۇمكىندىك پايدا بولدى. دەگەنمەن، كەز كەلگەن جاعدايدا Lost&Found بولىمىنە حابارلاپ، اۋەكومپانياعا مالىمدەۋ ماڭىزدى.
قۇجات شەتەلدە جوعالعان جاعدايدا
ەگەر پاسپورت قازاقستاننان تىس جەردە جوعالعان بولسا:
-
قازاقستاننىڭ ەڭ جاقىن كونسۋلدىعىنا نەمەسە ەلشىلىگىنە جۇگىنۋ.
-
جوعالتۋ تۋرالى حابارلاپ، قايتارۋ كۋالىگىن راسىمدەۋ. بۇل قۇجات قازاقستانعا كىرۋگە جانە تۇرعىلىقتى جەرگە جەتۋگە مۇمكىندىك بەرەدى.
"پاسپورت شەتەلدە جوعالعان جاعدايدا ازاماتتار قازاقستان رەسپۋبليكاسىنىڭ كونسۋلدىق مەكەمەسىنە جۇگىنەدى، وندا ولار قايتارۋ كۋالىگىن الادى، ول رك اۋماعىنا كىرۋگە جانە تۇرعىلىقتى جەرگە جەتۋگە جارامدى. قازاقستانعا كەلگەن سوڭ قۇجاتتى قالپىنا كەلتىرۋ ءۇشىن ۋاكىلەتتى ورگاندارعا جۇگىنۋ قاجەت"، – دەپ اتاپ ءوتتى سىرتقى ىستەر مينيسترلىگىنىڭ باسپا ءسوز قىزمەتى.
تاجىريبەلى ساياحاتشىلار جوعالعانىن جەرگىلىكتى پوليسيادا تىركەۋدى دە كەڭەس ەتەدى. سايكەستەندىرۋ تۋرالى انىقتاما جاڭا قۇجاتتار راسىمدەۋدە قاجەت بولۋى مۇمكىن.
ساياحاتشىلارعا كەڭەستەر
استانا اۋەجايىنىڭ وكىلدەرى ساپار بارىسىندا بارلىق قاجەت قۇجاتتىڭ بار-جوعىن الدىن الا تەكسەرىپ، ولاردى سەنىمدى ورىندا ساقتاۋ ماڭىزدى ەكەنىن ەسكەرتەدى.
تاجىريبەلى ساياحاتشىلار دا بىرنەشە كەڭەس بەرەدى:
-
قۇجاتتاردى اقشا مەن تەحنيكادان بولەك ساقتاۋ؛
-
پاسپورتتىڭ كوشىرمەسىن جانە فوتوسۋرەتتەرىن جاساۋ؛
-
ماقساتتى ەلدەگى قازاقستان كونسۋلدىق مەكەمەلەرىنىڭ مەكەنجايى مەن بايلانىس دەرەكتەرىن الدىن الا ءبىلۋ.