رەسەيدە قازاقستاندىق ءمۇسىنشىنىڭ جەكە كورمەسى اشىلدى.
تاريح، اتامەكەن، دۇنيەتانىم. تامەرلان تلەس ءوز تۋىندىلارىندا وسى تاقىرىپتاردى قوزعايدى. شەبەر ءوز ەڭبەكتەرىندە قازاق حالقىنىڭ دۇنيەتانىمىن ۇلتتىق تاريح ارقىلى كورسەتۋگە تىرىسادى. سونداي جۇمىستاردىڭ ءبىرى – «ءومىر» پاننوسى. ونىمەن جۇمىس ىستەۋ بارىسىندا سۋرەتشى وتە سيرەك ماتاريالداردى ىزدەپ، ءۇش قۇرلىقتى شارلاعان. جاڭا ماتەريالدارمەن جۇمىس ىستەۋدى حاس شەبەرلەردەن مەڭگەرىپ تە قايتقان، دەپ حابارلايدى Almaty-akshamy.kz Qazaqtv.com-عا سىلتەمە جاساپ.
تامەرلان تلەس ەجەلگى قولونەر ادىستەرىن وزىنشە جەتىلدىرىپ، زاماناۋي تەحنولوگيالارمەن شەبەر ۇيلەستىرە الاتىنىمەن ەرەكشەلەنەدى. ەكسپوزيسيانىڭ ءوزى ونەر تىلىمەن جەتكىزىلگەن حيكايا سىندى. قازاقستاندىق ءمۇسىنشىنىڭ سانكت-پەتەربۋرگتەگى كورمەسى قازاننىڭ 9-ىنا دەيىن جالعاسادى.
«جەرگىلىكتى تۇرعىنداردىڭ قازاقستان تۋرالى ءبىلىمى كوپ ەمەس. قازاقستان – تاريحى ەجەلدەن تامىر تارتقان، مادەنيەتى باي، فيلوسوفياسى تەرەڭ كەرەمەت ەل. تامەرلان ونى ءوز شىعارماشىلىعىمەن جاقسى جەتكىزە بىلگەن. شىعارماشىلىعى ءارقيلى ءارى قولداناتىن ماتەريالدارى دا سان ءتۇرلى. تاستى دا، مامونت ءمۇيىزىن دە، مەتالل مەن باعالى تاستاردى شەبەر ۇيلەستىرە بىلەدى. وسى جەردە قازاق حالقىنىڭ ءداستۇرلى ومىرىنەن سىر شەرتەتىن ەڭبەكتەردى تاماشالاۋعا بولادى. تاڭقالدىرارلىق»، - دەيدى مەملەكەتتىك شىعىس مۋزەيىنىڭ عىلىمي قىزمەتكەرى ماريا فيلاتوۆا.
«كەلگەن قوناقتار قازاق مادەنيەتى تۋرالى حابار الىپ، سۇراق قويىپ جاتىر. سالت-داستۇرلەرىمىز، كوكپار ويىنى تۋرالى بىلگىسى كەلگەندەر كوپ بولدى. قازاق حالقىنىڭ مادەنيەتىن تانىستىرۋ – مەن ءۇشىن قۇرمەت. ونەر ارقىلى حالىقتاردى جاقىنداستىرۋ، ءتول مادەنيەتىمىزدى كەڭگە تانىستىرۋ ءۇشىن ەڭبەك ەتىپ كەلەمىز»، - دەيدى ءمۇسىنشى تامەرلان تلەس.
.