ماۋسىم ايىندا ازىق-تۇلىك تاۋارلارىنىڭ الەمدىك باعاسى ازداپ تومەندەدى.
فاو ەت باعاسىنىڭ يندەكسى ماۋسىم ايىندا كەزەكتى رەت رەكوردتىق دەڭگەيگە – 124،7 پۋنكتكە جەتتى. بۇل مامىر ايىنداعى كورسەتكىشتەن 1،7%-عا جانە 2021 جىلعى ماۋسىم دەڭگەيىنەن 12،7%-عا جوعارى. بۇل تۋرالى بىرىككەن ۇلتتار ۇيىمىنىڭ ازىق-تۇلىك جانە اۋىلشارۋاشىلىق ۇيىمىنىڭ (فاو) شولۋىندا ايتىلعان، دەپ حابارلايدى Almaty-akshamy.kz.
«بارلىق ەت تۇرلەرىنىڭ الەمدىك باعاسى ءوستى، ءبىراق باسقالارعا قاراعاندا رەكوردتىق دەڭگەيگە دەيىن قۇس ەتى قىمباتتادى، ويتكەنى ۋكرايناداعى سوعىس پەن سولتۇستىك جارتى شاردا قۇس تۇماۋىنىڭ ورشۋىنە بايلانىستى الەمدىك نارىقتاعى ۇسىنىس ءالى دە شەكتەۋلى. جۇڭگو برازيليادان ەت يمپورتتاۋعا سالعان تىيىمىن الىپ تاستاعان سوڭ سيىر ەتىنىڭ باعاسى كوتەرىلدى»، - دەلىنگەن فاو شولۋىندا.
شولۋداعى دەرەك بويىنشا، شوشقا ەتى باعاسىنىڭ شامالى ءوسۋى ءبىرقاتار جەتەكشى يمپورتتاۋشىلاردان ساتىپ الۋدىڭ ارتۋىنا بايلانىستى بولعان. دەگەنمەن جۇڭگو ءالى دە شوشقا ەتىن شەكتەۋلى مولشەردە ساتىپ الادى. قوي ەتىنىڭ الەمدىك باعاسىنىڭ وسۋىنە سولتۇستىك ازيا ەلدەرىنىڭ سۇرانىسىنىڭ ازدىعىنا قاراماستان، جاڭا زەلاندياداعى ەكسپورتتىق قورلاردىڭ ازايۋى سەبەپ بولعان.
فاو دەرەكتەرى بويىنشا ماۋسىم ايىندا ازىق-تۇلىك تاۋارلارىنىڭ الەمدىك باعاسى ازداپ تومەندەدى، مۇنداي ترەند قاتارىنان ءۇشىنشى اي بايقالادى. بۇل رەتتە ازىق-تۇلىك تاۋارلارىنا باعا يندەكسىنىڭ ءمانى 2021 جىلعى ماۋسىمداعى كورسەتكىشتەن 23،1%-عا جوعارى بولىپ قالادى. وتكەن ايدا وسىمدىك مايلارىنا، ءداندى داقىلدار مەن قانتقا الەمدىك باعانىڭ تومەندەۋى بايقالدى.