قاي وڭىردە سۋ تاپشى؟

وڭتۇستىك جانە باتىس وڭىرلەر شەكارالاس ەلدەرگە تاۋەلدى بولىپ وتىر.

ەكولوگيا، گەولوگيا جانە تابيعي رەسۋرستار مينيسترلىگى سۋ رەسۋرستار كوميتەتىنىڭ ءتوراعا ورىنباسارى دوسبول بەكماعامبەتوۆ وڭىرلەردەگى سۋ رەسۋرستارىنىڭ جاي-كۇيىن ايتىپ بەردى، دەپ حابارلايدى Almaty-akshamy.kz

«سۋ رەسۋرستارىنا قاتىستى جاعداي وڭىرلەر بويىنشا ءار ءتۇرلى. ەلدىڭ شىعىس ءوڭىرى سۋ رەسۋرستارىمەن اناعۇرلىم كوبىرەك قامتاماسىز ەتىلسە، ورتالىق قازاقستان (نۇرا-سارىسۋ باسسەينى) ەڭ از قامتىلعان. وڭتۇستىك جانە باتىس وڭىرلەر شەكارالاس ەلدەرگە تاۋەلدى بولىپ وتىر. سوندىقتان بولجانىپ وتىرعان سۋ تاپشىلىعى وسى وڭىرلەرگە كوبىرەك اسەر ەتەدى»، - دەدى د. بەكماعامبەتوۆ.

بۇعان دەيىن دوسبول بەكماعامبەتوۆ قازاقستاندا 2030 جىلعا قاراي سۋ رەسۋرستارىنىڭ تاپشىلىعى 23،2 تەكشە كيلومەترگە جەتۋى مۇمكىن ەكەنىن ايتقان ەدى. 2000 جىلدارى ورتاشا كوپجىلدىق وزەن اعىسى 120 تەكشە كيلومەتر بولسا، قازىرگى ۋاقىتتا ول شامامەن 102 تەكشە كيلومەتردى قۇرايدى.

بۇل كليماتتىڭ وزگەرۋىنە جانە انتروپوگەندىك فاكتورلارعا بايلانىستى. 2030 جىلعا قاراي وزەن اعىنى ودان ءارى 99،4 تەكشە كيلومەترگە دەيىن قىسقارۋى بولجانىپ وتىر.