سابىركۇل اسانوۆا اتىنداعى شىعارماشىلىق ستۋديا اشىلدى
ۇلتتىق برەند – «سىمبات» ءسان اكادەمياسىنىڭ نەگىزىن قالاۋشى، پروفەسسور، ق ر پەداگوگيكا عىلىمى اكادەمياسىنىڭ اكادەميگى، قازاقستاننىڭ ەڭبەك سىڭىرگەن قايراتكەرى سابىركۇل جايلاۋبەك قىزى 80 جاسقا تولدى. ءومىرىن قازاقتىڭ ۇلتتىق ونەرىنە ارناعان سانگەر –قازاقستاننىڭ ءسان يندۋسترياسىنىڭ كۋاگەرى.
مەرەيتويعا وراي، 28 اقپان-1 ناۋرىز ارالىعىندا سابىركۇل اسانوۆانىڭ عىلىمي-زەرتتەۋ، شىعارماشىلىق جانە وندىرىستىك قىزمەت جولىنا ارنالعان ءبىرقاتار ءىس-شارا وتكىزۋ جوسپارلانعان. سولاردىڭ ءبىرى – «سىمبات» اكادەمياسىنداعى سابىركۇل اسانوۆا اتىنداعى شىعارماشىلىق ستۋديانىڭ اشىلۋى. اكادەميادا ءبىلىم الىپ جۇرگەن ستۋدەنتتەر شىعارماشىلىقپەن اينالىساتىن ستۋديا مۇراجاي رەتىندە اشىلدى. ستۋدياعا سانگەردىڭ قولىنان شىققان ۇلتتىق كيىمدەر مەن باسقا دا شەبەرلەردىڭ تۋىندىلارى قويىلعان. سول جەردەگى ينتەراكتيۆتى تاقتا ارقىلى سابىركۇل اسانوۆانىڭ ديزاينەرلىك جۇمىستارىمەن تانىسا الادى.
ءىس-شاراعا ونەر قايراتكەرلەرى، ەلىمىزدىڭ جوو-نىڭ باسشىلارى، سانگەردىڭ قىرعىزستان، تۇركيا مەن موڭعوليادان كەلگەن زامانداستارى قاتىسىپ، شىعارماشىلىق قىزمەتى تۋرالى ەستەلىكتەرمەن ءبولىستى.
«تۇركسوي» حالىقارالىق تۇركى مادەنيەتى ۇيىمىنىڭ باس حاتشىسىنىڭ ورىنباسارى يۋسۋف ساييت ارنايى كەلىپ، تۇركى مادەنيەتىنە سىڭىرگەن ەڭبەگى ءۇشىن مەرەيتوي يەسىنە «تۇركسوي» توسبەلگىسىن تابىستادى.
«مۋزەيگە سابىركۇل جايلاۋبەك قىزىنىڭ 55 جىل ەڭبەك جولىندا جاساعان جۇمىستارى مەن «سىمبات» اكادەمياسىنىڭ حالىقارالىق دەڭگەيدە كورسەتكەن قولونەرلەرى قويىلدى. «زامانداستار وچەركى» اتتى كىتابىنىڭ تۇساۋى كەسىلدى. قولونەرگە، ونىڭ ىشىندە، قۇراق ونەرىنە ارناعان جوبالارى قويىلدى»، - دەيدى «سىمبات» ديزاين جانە تەحنولوگيا ينستيتۋتىنىڭ پرورەكتورى بوتاگوز تۇرعانبەك قىزى.
تاقىرىپقا وراي
جاننا مۇستافينا، تەحنيكا عىلىمىنىڭ كانديداتى: «جەڭ قوندىرا الاسىڭ با؟»
سابىركۇل اسانوۆانىڭ مەنى جۇمىسقا قابىلداردا قويعان ءبىرىنشى سۇراعى وسى بولدى. ماعان بۇل سۇراقتى قويعاندا، قاتتى تاڭ قالىپ، ريزا بولعانىم ەسىمنەن كەتپەيدى. ويتكەنى، ناعىز كاسىبي سۇراق بولدى. ۇلكەن اكادەميانىڭ باسشىسىنان مۇنداي سۇراق كۇتپەدىم. ول كەزدە ۇساق سۇراق بولىپ كورىندى. ءبىراق كەز كەلگەن تىگىن بۇيىمىنىڭ ءساتتى شىعۋى جەڭىن قوندىرۋىنا بايلانىستى بولادى. سوندىقتان تىگىن سالاسىنىڭ ماماندارى بۇعان ۇلكەن ءمان بەرەدى.
ۇجىمداعى قىزمەتكەرلەردىڭ بارىمەن ءوزى سويلەسىپ، جۇمىسقا قابىلدايدى. نەگىزگى قاعيداسى – ناتيجە. ارىپتەستەرى مەن شاكىرتتەرىنەن ەڭ ءبىرىنشى ناتيجە كۇتەدى. وزىنە ۇلكەن تالاپ قويادى، وزگەگە دە تالاپشىل ادام. سابىركۇل اسانوۆانىڭ جەتەكشىلىگىمەن ماگيستراتۋرا ءبىتىرىپ، كانديداتتىق ديسسەرتاسيا قورعادىق. بىرنەشە جىل بۇرىن ول كىسىنىڭ باستاماسىمەن اكادەميادا ديسسەرتاسيالىق كەڭەس اشىلعان بولاتىن. ءوزى تىگىن تەحنولوگياسى بويىنشا العاشقى ديسسەرتاسيا قورعاپ، دوكتورلىق اتاعىن الدى. بىرنەشە كانديدات پەن دوكتورلار تاربيەلەپ شىعاردى.
