استاناداعى يۋنۋس ەمرە اتىنداعى تۇرىك مادەنيەت ورتالىعىنىڭ ۇيىمداستىرۋىمەن الماتى قالاسىنداعى «قازاق كونسەرت» زالىندا «نوتالار ساياحاتى» اتتى تۇرىك ونەرپازداردىڭ كونسەرتى ءوتتى.
كونسەرتتە «دومبىرا» اتتى انىمەن بارشا تۇركى الەمىنە تانىمال ءانشى، كومپوزيتور ارسلانبەك سۇلتانبەكوۆ پەن وركەسترى ونەر كورسەتتى. شاراعا تۇركيا رەسپۋبليكاسىنىڭ الماتى قالاسىنداعى باس كونسۋلى ەۆرەن مۇدەرريسوگلۋ قاتىسىپ، ونەرپازداردى ماراپاتتادى، دەپ حابارلايدى اlmaty-akshamy.kz.
ەكى باۋىرلاس ەل تۇركيا مەن قازاقستاننىڭ اراسىنداعى مادەني شارالار باسقا سالالارمەن قاتار ۋاقىت وتكەن سايىن ارتىپ كەلەدى. ءان مەن كۇيدىڭ حالىقتاردىڭ ءبىر –ءبىرىن تانۋداعى ورنى ەرەكشە. تۇركى جۇرتىنىڭ جاراسىمدىلىعى مەن سىيلاستىعى الماتىداعى ساحنا تورىندە دە ەرەكشە كورىنىس تاپتى. كونسەرتتە تۇرىك، قازاق، التاي، نوعاي تىلدەرىندە ءان مەن كۇيلەر ورىندالدى.
وركەستر قۇرامىنداعى تۇرىك ونەرپازدار باسقا اسپاپتارمەن قاتار تۇركى وركەنيەتىنىڭ اسپابى دومبىرا جانە قوبىزبەن دە ورىندالعان شىعارمالاردى سۇيەمەلدەدى. تۇركيادان كەلگەن ءانشى اكدەنيز ەرباش قادىر ءمىرزاالىنىڭ سوزىنە جازىلعان ءاشىرحان تەلعوزييەۆتىڭ «قازاق وسى» ءانىن ناقىشىنا كەلتىرە ورىنداپ، تىڭدارماننىڭ زور ىقىلاسىنا بولەندى.
يۋنۋس ەمرە اتىنداعى تۇرىك مادەنيەت ورتالىعىنىڭ ديرەكتورىنىڭ مىندەتىن اتقارۋشى Ph.Dr. الماگۇل يسينانىڭ ايتۋىنشا «نوتالاردىڭ ساياحاتى» اتتى كونسەرت يۋنۋس ەمرە ينستيتۋتىنىڭ ۇيىمداستىرۋىمەن وتكەن ايلاردا ماجارستاننىڭ استاناسى بۋداپەشت مەن سولتۇستىك كيپر تۇرىك رەسپۋبليكاسىندا وتكەن بولاتىن. ال الماتىداعى كونسەرت بولسا، ارسلانبەك سۇلتانبەكوۆ پەن وركەستردىڭ ءۇشىنشى كونسەرتى بولىپ تابىلادى.
كەشتىڭ قوناعى رەتىندە قازاقستاندىق ەتنو-فولك «ارقايىم» توبىنىڭ سوليستەرى ابزال ارىقبايەۆ پەن انار قاسىموۆا قاتىسىپ، ۇلتتىق داستۇردەگى جانە زاماناۋي شىعارمالار ورىندادى. تالانتتى دومبىراشىلار تولعاناي حاسەن مەن ايدانا قابىلوۆا قازاق كۇيلەرىن تىڭداۋشىعا تارتۋ ەتتى.
كونسەرتتىڭ سوڭىندا وركەستردىڭ سۇيەمەلدەۋىمەن تۇرىك جانە قازاق ونەرپازدار ورىنداعان ارسلانبەك سۇلتانبەكوۆتىڭ «دومبىرا» ءانى كورەرمەندەردىڭ ەرەكشە قوشەمەتىنە يە بولدى.