الماتىلىق جاس ديزاينەرلەر قىرعىزستاندا وتەتىن ءسان اپتالىعىنا قاتىسادى
ەلىمىزدەگى ءسان يندۋسترياسىن الەمدىك دەڭگەيگە شىعارعان Kazakhstan Fashion Week جوباسى ۋاقىت وتكەن سايىن قارقىندى دامىپ كەلەدى.
جاقىندا الماتىدا شىعارماشىل جاستاردىڭ باسىن قوسىپ، ولاردىڭ فەشن يندۋستريا الەمىندەگى قولتاڭبالارىن پاش ەتۋگە باعىتتالعان Kazakhstan Fashion Week (KFW) ۇلتتىق ءسان اپتالىعىنىڭ كەزەكتى 34-ماۋسىمى ءوتتى. Mercedes-Benz ديللەرلىك ورتالىعىندا ۇيىمداستىرىلعان سانگەرلەر سالتاناتىنا وتاندىق جانە شەتەلدىك ديزاينەرلەر وزدەرىنىڭ 30-عا جۋىق برەندىن ۇسىندى. ال كەرەمەت كەشتى ءسان الەمىنىڭ سەركەلەرىمەن قاتار، شەتەلدىك قوناقتار، كاسىپكەرلەر، شوۋ-بيزنەس وكىلدەرى، بلوگەرلەر مەن تالعامپاز كورەرمەندەر تاماشالادى. 
اپتالىقتىڭ شىمىلدىعى ەسىمى قازاقستاندا عانا ەمەس، شەتەلدەرگە دە كەڭىنەن تانىمال، تابىستى ديزاينەر ايدا كاۋمەنوۆانىڭ توپتاماسىمەن اشىلدى. بىرنەشە جىلدان بەرى ءوزىنىڭ جەكە ماركاسىندا (Aida KaumeNOVA) برەندتى كيىمدەر شىعاراتىن وتاندىق سانگەردىڭ بۇل جولعى كوللەكسياسىنداعى ءتۇسى قانىق رەڭكتەر مەن تابيعي ماتانىڭ ءمىنسىز ۇيلەسىمى كوپشىلىككە ەرەكشە شابىت سىيلادى. ونىڭ ءار توپتاماسىنان ۇلتىنىڭ ءسالت-داستۇرىن قۇرمەتتەيتىن جانە ءوزىنىڭ ەرەكشە ءستيلىن ساقتاي وتىرىپ، زاماناۋي تابىستى ايەلدىڭ دارالىعىن كورسەتەتىن بەينەلەردى كوردىك. 
جاڭا ديزاينەرلىك توپتامالاردىڭ فەشن-كورسەتىلىمىن ودان كەيىن يسسەنكەل جانە ۆەللا احتيمەر، الەكسەي چجەن، اديليا بوتابايەۆا، لەونيد جەرەبسوۆ سىندى برەند يەلەرى مەن جاس ديزاينەرلەردىڭ كيىم ۇلگىلەرى جالعاستىردى. جىلىنا ەكى مارتە، ياعني كوكتەم-جاز، كۇز-قىس كوللەكسيالارىن ۇسىناتىن جوبا بيىل دا جاستار شىعارماشىلىعىنا باسىمدىق بەرىپتى. 
اپتالىقتىڭ العاشقى كۇنىنەن ەرەكشە كوزگە ءتۇسىپ، كورەرمەن كوزايىمىنا اينالعان جاس ديزاينەرلەردىڭ قاتارىندا الماتىلىق ءنۇسىپ توعجان مۇرات قىزى دا بار. 
توعجان ءنۇسىپ – New Generation Open Way 2023 بايقاۋىندا 300-گە جۋىق كيىم ەسكيزدەرى مەن وتىنىشتەرىن ۇسىنعان ۇمىتكەردىڭ اراسىنان 22 ءفيناليستىڭ تىزىمىنە ەنگەن جەڭىمپازدىڭ ءبىرى. قازىرگى تاڭدا ت.جۇرگەنيەۆ اتىنداعى ۇلتتىق اكادەميانىڭ «تەاتر جانە كينو ساحنالىق كوستيۋمى» ماماندىعىنىڭ ءبىتىرۋشى ستۋدەنتى، ساندىك قولدانبالى ونەر سالاسىنىڭ تەكستيل سۋرەتشىسى. وتكەن جىلى «مatai» برەندىمەن كوپشىلىككە تانىلعان توعجان بيىل سانسۇيەر قاۋىمنىڭ نازارىنا ەتنيكالىق ستيلدەگى KIVAZ برەندىمەن BAYAN توپتاماسىن ۇسىنىپ وتىر. 
ۇلتتىق ناقىشتىڭ ءسان الەمىندە بىرنەشە باعىتتارى بار ەكەنىنە ەرەكشە كوڭىل بولگەن جاس سانگەردىڭ BAYAN كوللەكسياسى كوشپەندىلەردىڭ ءداستۇرلى مادەنيەتىن بەينەلەيدى. كيىم ۇلگىلەرىندە وزىندىك ستيل، يدەيالار مەن وتكىر فيلوسوفيالىق ءمان جاتقان تالانتتى بويجەتكەننىڭ تۋىندىلارىندا قازاقتىڭ ويۋ-ورنەكتەرى مەن اشەكەيلەرى وتە ادەمى ۇيلەستىرىلگەن. ءداستۇرلى ەلەمەنتتەردى دە زاماناۋي ترەندتەرمەن بايلانىستىرىپ شەبەر قولدانا بىلگەن.
جەتىستىككە جەتۋ ءۇشىن تاباندىلىق، ىسكەرلىك، تالعامپازدىقپەن قوسا ءبىلىم قاجەت دەگەن جاس ديزاينەر ءسان الەمىنە باسقان قادامى جايىندا بىلاي دەيدى:
– KFW ۇلتتىق ءسان اپتالىعىنىڭ بيىلعى ماۋسىمىندا KIVAZ برەندىمەن Bayan دەپ اتالاتىن العاشقى، دەبيۋتتىك توپتامامدى ۇسىندىم. بۇل مەنىڭ ءسان الەمىنە ديزاينەر رەتىندە اتتاعان العاشقى قادامىم دەسەم دە بولادى. KIVAZ – ساق تىلىنەن اۋدارعاندا «قورعانىس»، «كۇش»، «باتىلدىق» جانە «توزىمدىلىك» سەكىلدى بىرنەشە ماعىنانى بىلدىرەدى، – دەيدى ول.
توعجاننىڭ تۋىندىلارىندا ۇلتتىق بوياۋ بار. ول قازىرگى جاستاردىڭ ەتنوستيلگە قىزىعۋشىلىعى ارتىپ كەلە جاتقانىن ەسكەرىپ، تۋىندىلارىنىڭ بارلىعىن سۇرانىسقا بەيىمدەپ ازىرلەگەنىن ايتادى.
– كيىم ۇلگىلەرىمنىڭ ديزاينى جاستاردىڭ تالعامىنا ساي بولۋى ءۇشىن وعان قازاق حالقىنىڭ عاسىرلار تالعامىنان وتكەن تاڭبالى ورنەكتەرىن، بايىرعى زاماننان باستاۋ الاتىن ساندىك قولدانبالى ونەردى – كەستەلەۋ، باتيك، دىمقىل جانە قۇرعاق كيىز باسۋ، سىرىپ تىگۋ، قۇراق قۇراۋ تەحنيكالارىن پايدالاندىم. ءاربىر وبرازدا ماتالار فاكتۋراسى، تۇستەر جيىنتىعى مەن سيلۋەتتىڭ سان الۋاندىعىن ويناتا وتىرىپ، ەجەلگى كوشپەندى حالىقتىڭ رۋحاني نەگىزى مەن تۇرمىس تىرشىلىگىن كورسەتۋگە تىرىستىم. ارمانىم – الدىڭعى تولقىن اعا-اپالارىمىز سەكىلدى ادەمىلىك الەمىندە قولتاڭبامدى قالدىرىپ، ءوز برەندىمدى قالىپتاستىرۋ، – دەيدى توعجان.
ءيا، سانگەر جۇمىسىنىڭ باستى ماقساتى – ەرەكشە وبراز جاساۋ ارقىلى ادامنىڭ ءستيلىنىڭ دارالىعىن ايقىن كورسەتۋ. بۇل رەتتە توعجاننىڭ العا قويعان جوسپارى دا كوپ. ال ولاردى جۇزەگە اسىرۋ ءۇشىن تاباندىلىق پەن شەبەرلىكتىڭ قاجەت ەكەنى ءسوزسىز. ماسەلەن، توعجان بيىلعى توپتامالارىنىڭ ەسكيزدەرىن 2023 جىلدىڭ كۇز ايىندا باستاعان. جالپى دايىندىق پەن تىگۋ جۇمىستارىنا ءۇش ايعا جۋىق ۋاقىت جۇمساپتى. 
ەڭبەگىنىڭ ناتيجەسى سول، جاقىندا توعجان ءنۇسىپتىڭ KIVAZ برەندى مەن ايا نۇركەنوۆانىڭ Na MI Lab برەندى Kazakhstan Fashion Week ءسان اپتالىعى ۇيىمداستىرۋشىلارىنىڭ قولداۋىمەن قىرعىزستاننىڭ بىشكەك قالاسىندا وتەتىن Dordoi Plaza Fashion Show 2024 ءسان اپتالىعىنا قازاقستان اتىنان قاتىسادى. جاستار ءۇشىن بۇل ۇلكەن جەتىستىك! ءبىز جاس ديزاينەرلەرگە ءسان الەمىندەگى جۇلدىزدى ساتتەرى كوپ بولسىن دەپ تىلەك ايتامىز! 
