«سامۇرىق-قازىنا» كومپانياسى ورىس تىلىنە باسىمدىق بەرەدى

ءتىل ساياساتى كوميتەتىنىڭ ۇيىمداستىرۋىمەن ۇلتتىق كومپانيالاردىڭ قۇجات اينالىمىنداعى مەملەكەتتىك ءتىلدىڭ ۇلەسىنە جۇرگىزىلگەن مونيتورينگ قورىتىندىسى تالداندى، -دەپ حابارلايدى Almaty-akshamy.kz. قازاقپارات-قا سىلتەمە جاساپ.

بۇگىندە مەملەكەتتىك ءتىلدىڭ مەمباسقارۋ، زاڭ شىعارۋ، سوت ءىسىن جۇرگىزۋ جانە ءىس-قاعازدارىن جۇرگىزۋ ءتىلى ەكەنى «قازاقستان رەسپۋبليكاسىنداعى ءتىل تۋرالى» ق ر زاڭىنىڭ 4-بابىندا كورسەتىلگەن.

ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى تاراتقان مالىمەتكە سەنسەك، بيىلعى ءى توقساندا ۇلتتىق كومپانيالاردىڭ مەملەكەتتىك تىلدەگى قۇجات اينالىمىنىڭ ۇلەسى 73% قۇراعان.

بۇل بىلتىرعى جىلدىڭ وسى كەزەڭىمەن سالىستىرعاندا 37%-كە ارتىق (2022 جىلدىڭ ءى توقسانى – 36%).

دەگەنمەن، «سامۇرىق-قازىنا» ۇلتتىق ءال-اۋقات قورى» اق (32%)، «قازاقستان تەمىر جولى» اق (43%)، «قازپوشتا» اق (57%)، «اتامەكەن» ق ر ۇلتتىق كاسىپكەرلەر پالاتاسى (61%)، «بايتەرەك» ۇبح اق (67%)، «قازمۇنايگاز» ۇق (69%) جانە ت.ب. كورسەتكىشتەرى ءالى دە تومەن.

ال «قازاتومونەركاسىپ» ۇاك» اق (82%)، «ۇلتتىق اقپاراتتىق تەحنولوگيالار» اق (82%)، «KEGOK» اق (84%)، «دامۋ كاسىپكەرلىكتى دامىتۋ قورى» اق (85%)، «قازاقستان ينجينيرينگ» ۇك» اق (87%) قۇجاتتارىن قازاق تىلىندە جۇرگىزۋدە ءوسىم بايقالادى.

جيىن باعدارلاماسىنا سايكەس «Kegoc» اق، «Kazakh Tourism» ۇك» اق مەملەكەتتىك ءتىلدىڭ قولدانىس اياسىن كەڭەيتۋ باعىتىندا اتقارىپ جاتقان جۇمىسى جايىندا بايانداما جاسادى.

ءتىل ساياساتى كوميتەتى ءتوراعاسىنىڭ ورىنباسارى گۇلنار حودجابەرگەنوۆا شارانى قورىتىندىلاي كەلە، ۇلتتىق كومپانيالاردىڭ ىشكى قۇرىلىمدىق بولىمشەلەرى مەن ەنشىلەس ۇيىمدارىنىڭ قۇجات اينالىمىنداعى مەملەكەتتىك ءتىلدىڭ ۇلەسىن ارتتىرۋ باعىتىنداعى جۇمىستى كۇشەيتۋ قاجەتتىگىن ەرەكشە اتاپ ءوتتى.