«سامۇرىق-قازىنا» اكسيونەرلىك قوعامى كومپانيالار توبى بيىل 1،8 ترلن تەڭگە تازا پايدا تابۋدى جوسپارلاپ وتىر. مۇنى بريفينگ بارىسىندا قوردىڭ ەكونوميكا جانە قارجى جونىندەگى تەڭ باسقارۋشى ديرەكتورى ميرات وتەپوۆ ايتتى، دەپ حابارلايدى اlmaty-akshamy.kz.
«الدىن الا باعالاۋ بويىنشا، «سامۇرىق-قازىنا» اق كومپانيالار توبىنىڭ 2023 جىلعى تازا پايداسى 1،8 ترلن تەڭگە دەڭگەيىندە كۇتىلۋدە. مۇناي جانە گاز نارىقتارىندا قالىپتاسقان جاعدايدى جانە وندىرىستىك كورسەتكىشتەردى جاقسارتۋ بويىنشا قابىلدانىپ جاتقان شارالاردى ەسكەرەتىن بولساق، بۇل جاقسى ناتيجە سانالادى»، - دەدى ميرات وتەپوۆ.
سپيكەر تۇسىمگە بىرنەشە فاكتور تەرىس اسەر ەتكەنىن اتاپ ءوتتى. ءبىرىنشىسى – مۇناي باعاسىنىڭ تومەندەۋى. قازىرگى ۋاقىتتا 1 باررەل مۇنايدىڭ باعاسى شامامەن 80 دوللار. ول بىلتىر 105 دوللار بولعان ەدى. ەكىنشىسى – باعانىڭ تومەندەۋى سالدارىنان قازاقستاننان ەكسپورتتالعان گاز كولەمى ازايعان. سونىمەن قاتار ەل ىشىندە گازعا سۇرانىس ارتقان.
بيىل «سامۇرىق-قازىنا» اق شامامەن 658 ملرد تەڭگەنى مەملەكەت پايداسىنا باعىتتايدى. ياعني، بۇل سوما ديۆيدەند تولەۋگە، الەۋمەتتىك جوبالار مەن قايىرىمدىلىققا جۇمسالادى. الدىن الا دەرەككە ساي، وسى اقشانىڭ 146 ملرد تەڭگەسى رەسپۋبليكالىق بيۋدجەتكە، 353 ملرد-ى الەۋمەتتىك سالاعا باعىتتالادى. سونداي-اق اكتيۆتەردى جەكەشەلەندىرۋ قورىتىندىسى بويىنشا مەملەكەت قازىناسىنا قوسىمشا 92 ملرد تەڭگە تۇسەدى.