«ەڭبەك رەسۋرستارىن دامىتۋ ورتالىعى» اق قازاقستاننىڭ مەملەكەتتىك جۇمىسپەن قامتۋ قىزمەتىنىڭ وكىلى رەتىندە دۇنيەجۇزىلىك مەملەكەتتىك جۇمىسپەن قامتۋ قىزمەتتەرى قاۋىمداستىعىنا كىردى.
WAPES – بۇل جۇمىسپەن قامتۋ قىزمەتىنە نەمەسە ەڭبەك نارىعىنداعى ساياساتتى جۇزەگە اسىرۋعا جاۋاپتى مەملەكەتتىك جانە ۇكىمەتتىك ورگانداردىڭ حالىقارالىق كوممەرسيالىق ەمەس قاۋىمداستىعى، دەپ حابارلايدى Almaty-akshamy.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
ونى 1988 جىلى كانادا، فرانسيا، گەرمانيا، نيدەرلاندى، شۆەسيا جانە اقش مەملەكەتتىك جۇمىسپەن قامتۋ قىزمەتتەرى حالىقارالىق ەڭبەك ۇيىمىمەن بىرلەسىپ قۇرعان بولاتىن.
WAPES-كە قاتىسۋشى ەلدەر ءوزارا جاھاندىق كاسىبي بايلانىستى قولدايدى، جۇمىسقا ورنالاستىرۋ، كوشى-قون، كاسىپتىك وقىتۋ جانە مەملەكەتتىك جۇمىسپەن قامتۋ قىزمەتتەرىنىڭ (بۇدان ءارى – مجق) بىرلەسكەن جوبالارى مەن ءىس-شارالارى شەڭبەرىندە ىنتىماقتاستىقتى جۇزەگە اسىرادى.
قازاقستاننىڭ مەملەكەتتىك جۇمىسپەن قامتۋ قىزمەتىنە وبلىس ورتالىقتارى مەن استانا، الماتى جانە شىمكەنت قالالارىنداعى 20 ەڭبەك موبيلدىلىگى ورتالىعى، اۋداندار مەن قالالاردا ورنالاسقان 207 مانساپتىق ورتالىق، جۇمىسپەن قامتۋ ماسەلەلەرى جونىندەگى جەرگىلىكتى ورگاندار كىرەدى.
جۇمىسپەن قامتۋ سالاسىنداعى ساياساتتى ق ر ەڭبەك جانە حالىقتى الەۋمەتتىك قورعاۋ مينيسترلىگى ايقىندايدى. ەردو ءوز كەزەگىندە ەڭبەك نارىعىن اقپاراتتىق-تالدامالىق سۇيەمەلدەۋدى، جۇمىسپەن قامتۋعا جاردەمدەسۋدىڭ بەلسەندى شارالارىن، جۇمىسپەن قامتۋ قىزمەتىن ءادىسنامالىق قولداۋدى، الەۋمەتتىك-ەڭبەك سالاسىنىڭ ءبىرىڭعاي اقپاراتتىق جۇيەسىن دامىتۋدى جانە سۇيەمەلدەۋدى قامتاماسىز ەتەدى.
قاۋىمداستىقتىڭ مۇشەسى بولا وتىرىپ، قازاقستان جۇمىسپەن قامتۋ جانە ەڭبەك نارىعى سالاسىندا اقپارات الماسۋ ماقساتىندا WAPES-كە قاتىسۋشى ەلدەرمەن بايلانىستا بولىپ، مجق سالاسىنداعى ۇردىستەر تۋرالى حاباردار بولادى، WAPES جۇرگىزەتىن جوبالار مەن زەرتتەۋلەرگە قاتىسا الادى.
بۇل قازاقستاننىڭ جۇمىسپەن قامتۋ قىزمەتىنىڭ كاسىبي الەۋەتىن ارتتىرۋعا جانە ونىڭ قىزمەتىنە وزىق حالىقارالىق تاجىريبەنى ەنگىزۋگە، سونداي-اق مجق ستراتەگياسى مەن قىزمەتى بويىنشا جاھاندىق ديالوگقا ۇلەس قوسۋعا، قازاقستاننىڭ حالىقارالىق ارەناداعى جۇمىسپەن قامتۋ سالاسىنداعى جەتىستىكتەرى تۋرالى مالىمدەۋگە مۇمكىندىك بەرەدى.