ىشكى ىستەر مينيسترلىگى ەلەكترلى كولىك قۇرالدارىن قولدانۋدىڭ ەرەجەلەرى مەن تالاپتارىن ەسكە سالدى، دەپ حابارلايدى Almaty-akshamy.kz. قازاقپاراتقا سىلتەمە جاساپ.
«سوڭعى جىلدارى بالالار عانا ەمەس، ەرەسەكتەر دە بەلسەندى قولداناتىن ءتۇرلى كولىك قۇرالدارىنىڭ سانى ارتتى. ول ەلەكترلىك سكۋتەرلەر، ساموكات، گيروسكۋتەرلەر تاعى باسقا. ولار جول قوزعالىسىنىڭ قاتىسۋشىلارى بولىپ سانالادى. سوندىقتان ىشكى ىستەر مينيسترلىگى ەلەكترلى سكۋتەرلەردى قولدانۋ ەرەجەسىنىڭ بارىن ەسكە سالادى. ەلەكترلى سكۋتەر ءبىر ادامعا ارنالعان كولىك قۇرالى، ماكسيمالدى جىلدامدىق 25 كم/ساع اسپايدى. ونىڭ الدىڭعى، ءبۇيىر جانە ارتقى جاعى جارىقپەن جابدىقتالۋى ءتيىس. جاقىن ماڭداعى ادامداردى ەسكەرتۋگە مۇمكىندىك بەرەتىن دىبىستىق قۇرىلعىسى بولۋى كەرەك. جولاۋشى قوزعالىس بارىسىندا جان-جاعىنا مۇقيات شولۋ جاساپ وتىرۋى ءتيىس، ۇيالى تەلەفوندى نەمەسە باسقا گادجەتتەردى پايدالانباۋ كەرەك. سونىمەن قاتار ءرولدى ەكى قولىڭىزبەن ۇستاڭىز، كولىك قۇرالىن اقىرىن جانە ۇقىپتى توقتاتىڭىز»، - دەدى ىشكى ىستەر مينيسترلىگىنىڭ وكىلى شۇعىلا تۇرلىبەك ۆەدومستۆودا وتكەن باسپا ءسوز ءماسليحاتىندا.
ونىڭ ايتۋىنشا، ەلەكترلى سكۋتەردى جارىق جەتكىلىكسىز ءارى تار جەرلەردە، سونداي-اق قوزعالىسقا كەدەرگى كوپ جەردە مىنبەگەن ءجون.
«كولىك كوپ جۇرەتىن جانە ادامدار كوپ بولاتىن جەرلەردەن اۋلاق بولىڭىز. ەلەكترلى سكۋتەردە قوزعالۋ كەزىندە شلەم، سونداي-اق قول، بىلەك، تىزە، باس جانە شىنتاقتى قورعايتىن قۇرالداردى پايدالانىڭىز. جۇك جانە جولاۋشى تاسىمالداماڭىز. جول ەرەجەلەرىن ساقتاي وتىرىپ، جۇرەتىن اۋماعىڭىز بەن قوزعالىس جىلدامدىعىن تاڭداۋ ماڭىزدى. جاياۋ جۇرگىنشى نەمەسە ۆەلوسيپەد مىنۋشىگە جاقىنداپ قالعان كەزدە ەسكەرۋ بەلگىسىن بەرىڭىز»، - دەيدى ول.
سونداي-اق، ۆەدومستۆو ەلەكترلى سكۋتەرگە ۇنەمى تەحنيكالىق قىزمەت كورسەتۋدى ۇمىتپاۋ كەرەكتىگىن ەسكەرتتى.