ەل اۋماعىندا قارۋ-جاراق تاپسىرۋ ناۋقانى ءجۇرىپ جاتىر

ءبىر اپتادا 399 قارۋ-جاراق پوليسياعا تاپسىرىلعان.

اكسيا ءالى دە جالعاسۋدا. بۇل تۋرالى ىشكى ىستەر مينيسترلىگىنىڭ وكىلى شۇعىلا تۇرلىبەك ءمالىم ەتتى، دەپ حابارلايدى Almaty-akshamy.kz.

«مينيسترلىك جىل سايىن وتكىزەتىن زاڭسىز ساقتالعان اتىس قارۋىن، وق-دارىلەردى جانە جارىلعىش زاتتاردى حالىقتان ساتىپ الۋ اكسياسى جالعاسۋدا. ول 10 ساۋىردە باستالدى. بۇل ماقساتقا رەسپۋبليكالىق بيۋدجەتتەن 88 ملن تەڭگەدەن استام قارجى ءبولىندى. ءبىر اپتا ىشىندە ىشكى ىستەر ورگاندارىنا 317 ازامات جۇگىندى، ولار ءوز ەركىمەن 399 اتىس قارۋىن، 1،4 مىڭنان استام قارۋ تاپسىردى. حالىقتان قارۋ-جاراق ساتىپ الۋ شاراسى 2008 جىلدان بەرى جۇرگىزىلىپ كەلەدى. وسى ۋاقىت ىشىندە ازاماتتار جالپى سوماسى 1،9 ملرد تەڭگەگە 56 مىڭنان استام اتىس قارۋى مەن 2 ملن استام پاتروندى ءوز ەركىمەن پوليسياعا تاپسىردى»، - دەدى شۇعىلا تۇرلىبەك مينيسترلىكتە وتكەن باسپا ءسوز ءماسليحاتىندا.

ونىڭ ايتۋىنشا، قابىلدانعان شارالار تيىمدىلىگىن كورسەتىپ وتىر. ونىڭ دالەلى سوڭعى 5 جىلدا قارۋ قولدانۋ ارقىل جاسالاتىن قىلمىستار سانى ازايعان.

«ەسكە سالا كەتەيىك، قارۋ-جاراقتى ەرىكتى تۇردە تاپسىرعانى ءۇشىن رەسپۋبليكالىق بيۋدجەتتەن قارۋدىڭ تەحنيكالىق جاعدايىنا بايلانىستى ونىڭ ءاربىر بىرلىگىنە 34 مىڭنان 345 مىڭ تەڭگەگە دەيىنگى سومادا تولەم جاساۋ كوزدەلەدى»، - دەيدى ول.

قارۋ-جاراق، ءوق-دارى جانە جارىلعىش زاتتاردى قابىلداۋ ءار اۋماقتىق پوليسيا مەكەمەسىندە جۇرگىزىلەدى.

«قاۋىپسىزدىكتى قامتۋ ماقساتىندا ۆەدومستۆو تابىلعان جارىلعىش زاتتار جانە وق-دارىلەرگە وزدىگىنەن ارەكەت جاساماۋدى جانە ولاردى تاسىمالداۋعا تىرىسپاۋعا شاقىرادى. ول ءۇشىن پوليسياعا 102 نومىرىنە نەمەسە 112 نومىرىنە تەلەفون ارقىلى حابارلاعان ءجون»، - دەپ حابارلايدى ىىم-نەن.