قارجى ۆيسە-مينيسترى ەرجان ءبىرجانوۆ شىعىس قازاقستان وبلىسىندا كاسىپكەرلەرمەن كەزدەسىپ، سالىق رەفورماسىنداعى وزگەرىستەردى ءتۇسىندىردى، دەپ حابارلايدى aqshamnews.kz
ۇكىمەت قوسىلعان قۇن سالىعىنىڭ (ققس) مولشەرلەمەسىن ءار سالاعا ساي سارالانعان تۇردە ءوسىرۋدى ۇسىنىپ وتىر. جالپى مولشەرلەمە – 16%، ارالىق مولشەرلەمە – 10%، ال اۋىل شارۋاشىلىعى تاۋارىن وندىرۋشىلەر ءۇشىن 0% مولشەرىندە بوساتۋ قاراستىرىلعان.
ۆيسە-مينيستردىڭ ايتۋىنشا، ققس بويىنشا ەسەپكە قويۋ شەگىن 80 ملن تەڭگەدەن 15 ملن تەڭگەگە دەيىن تومەندەتۋ، سونداي-اق ارنايى سالىقتىق رەجيمدەردى رەفورمالاۋ قاجەت. ال ارنايى سالىقتىق رەجيم مەن بولشەك سالىقتى ترانسفورماسيالاۋ جوسپارلانىپ وتىر.
ءقازىر جەڭىلدەتىلگەن دەكلاراسيا جۇيەسى جىلدىق كىرىسى 180 ملن تەڭگەگە دەيىنگى، جۇمىسشىلار سانى 30 ادامعا دەيىنگى كاسىپكەرلەر ءۇشىن 2% مولشەرلەمەنى قاراستىرادى. بۇعان قوسا، فورمالدى تۇردە بولشەك سالىق جۇيەسى بولعان. ول جىلدىق اينالىمى 2،4 ملرد تەڭگەگە دەيىنگى بيزنەستى قامتىدى. وندا قىزمەتكەرلەر سانىنا شەكتەۋ قويىلماعان جانە ماسليحاتتاردىڭ شەشىمىمەن 4% مولشەرلەمەسىن ەكى ەسە تومەندەتۋ مۇمكىندىگى بولعان.
ەندى وسى ەكى رەجيمدى ءبىرتۇتاس جەڭىلدەتىلگەن دەكلاراسيا فورماتىنا بىرىكتىرۋ كوزدەلىپ وتىر، بۇل رەتتە كىرىستىڭ جوعارعى شەگى ساقتالادى – ول شامامەن 2،4 ملرد تەڭگەنى قۇرايدى.
سالىقتىق تۇسىمدەردى ارتتىرۋ ماسەلەسى الداعى رەفورمانىڭ نەگىزگى تاقىرىپتارىنىڭ ءبىرى بولىپ وتىر. ۇكىمەت بيۋدجەتكە تۇراقتى كىرىس كوزىن قامتاماسىز ەتۋدى، ۇلتتىق قورعا تاۋەلدىلىكتى تومەندەتۋدى جانە بيزنەستى دامىتۋ ءۇشىن قولايلى جاعداي جاساۋدى كوزدەيدى. الايدا بۇل ماقساتتارعا جەتۋ ءۇشىن سالىق ساياساتىنىڭ ينۆەستيسيالىق وزگەرىستەرگە، كومپانيالاردىڭ باسەكەگە قابىلەتتىلىگىنە جانە ەكونوميكالىق وسىمگە ىقپالىن ەسكەرۋ قاجەت.
سالىق رەفورماسىن جەتىلدىرۋ بارلىق مۇددەلى تاراپتاردىڭ پىكىرلەرىن ەسكەرە وتىرىپ جۇرگىزىلەدى. سالىق جۇيەسىن جاڭعىرتۋ – بيزنەستىڭ دامۋىنا كەرى اسەر ەتپەيتىندەي ءارى ەكونوميكانىڭ باسەكەگە قابىلەتتىلىگىن ساقتايتىنداي ەتىپ جۇرگىزۋ ماڭىزدى.