ەل اۋزىنداعى شىمبۇلاق اتالىپ جۇرگەن تاۋ-شاڭعى ورتالىعىنىڭ «شىڭبۇلاق» ەكەنىن بىلەسىز بە؟ الاتاۋدىڭ تالعار اسۋىنىڭ بوكتەرىندەگى حالىقارالىق كەشەن 1954 جىلدان قىسقى سپورتپەن اينالىساتىنداردىڭ سۇيىكتى ورنىنا اينالعان. بۇل - قازاقستانداعى ەڭ ۇلكەن تۋريستىك ورتالىق. وسى جەردى جەرگىلىكتى جۇرت نەلىكتەن «شىڭبۇلاق» دەپ اتاعان؟
تاۋدان باستاۋ الاتىن بۇلاقتى «شىڭبۇلاق» دەپ اتاعان. ەجەلگى تاريحتان سىر شەرتەتىن بۇل جەر تەك كەيىنگى ءجۇز جىلدىڭ كولەمىندە عانا شەتەلدىكتەردىڭ دىبىس ۇندەستىگىنە قاراي «شىمبۇلاق» اتالىپ كەتكەن.
2025-2029 جىلدارعا ارنالعان الماتى تاۋ كلاستەرىن دامىتۋ جونىندەگى كەشەندى جوسپار اياسىندا ينفراقۇرىلىمدى جاقسارتۋ، تۋريستىك مارشرۋتتاردى جاڭارتۋ جانە قىزمەت كورسەتۋ ساپاسىن ارتتىرۋ بويىنشا اۋقىمدى وزگەرىستەر جوسپارلانعان. بۇل شارالار ءوڭىردىڭ تۋريستىك تارتىمدىلىعىن ارتتىرۋمەن قاتار، جەرگىلىكتى حالىق ءۇشىن جاڭا مۇمكىندىكتەر اشىپ، شاعىن جانە ورتا بيزنەستىڭ دامۋىنا سەرپىن بەرەدى.
«شىمبۇلاق» تاۋ-شاڭعى كۋرورتىنا سوڭعى ءۇش جىلداعى كەلۋشىلەر ستاتيستيكاسى
2024 جىلى كۋرورتقا 1،5 ميلليون تۋريست كەلگەن، ولاردىڭ سانى جازعى جانە قىسقى ماۋسىمدا بىردەي دەۋگە بولادى.
سۋرەت: Egemen.kz
2023 جىلمەن سالىستىرعاندا 13% ءوسىم بايقالدى، ال سوڭعى ءۇش جىل ىشىندە كەلۋشىلەر سانى 39%-عا ارتتى.
كۋرورتتاعى كەلۋشىلەر سانى ماۋسىمعا بايلانىستى:
• ادام كوپ جينالعان كۇندەرى: 8 000 – 12 000 ادام (ونىڭ ىشىندە جاياۋ جۇرگىنشىلەر مەن شاڭعىشىلار).
• ماۋسىمارالىق دەمالىس كۇندەرى: 5 000 – 6 000 ادام.
• كەلۋشىلەر از كەلەتىن ماۋسىمدا: 4 000 ادام.
• كۋرورتتىڭ وتكىزۋ قابىلەتى: كۇنىنە - 6 000 ادام.
كۋرورتقا جازعى جانە قىسقى ماۋسىمدا بىردەي كولەمدە تۋريست كەلەدى. جىل سايىن كۋرورتتا شاڭعى مەن سنوۋبورد تەبەتىن 350 000 ادام دەمالادى.
حالىقارالىق جانە رەسپۋبليكالىق جارىستار مەن ءىس-شارالار:
قىسقى ماۋسىمدا شىمبۇلاقتا سپورتتىق جانە مادەني ءىس-شارالار وتەدى:
• 4–11 قاڭتار – FIS جاسوسپىرىمدەر اراسىنداعى شاڭعى اكروباتيكاسى مەن موگۋلدان الەم چەمپيوناتى ءوتتى.
• 19 قاڭتار – حالىقارالىق Snow Day بالالارعا ارنالعان تەگىن جارىستار ۇيىمداستىرىلدى.
• 28 اقپان – 2 ناۋرىز – FIS فريستايلدان الەم كۋبوگىنىڭ كەزەڭدەرى وتەدى.
• 13–18 ناۋرىز – Shymbulak Freeride Week Qualifier، فريرايدتان حالىقارالىق جارىس.
• 1–7 ءساۋىر – Gorilla Winter Jungle – سپورت پەن مۋزىكانى بىرىكتىرەتىن ءداستۇرلى فەستيۆال.
«شىمبۇلاق» تۋرالى 10 قىزىقتى دەرەك:
1. 2022-2023 ماۋسىمىندا كۋرورت گيننەستىڭ رەكوردتار كىتابىنا الەمدەگى ەڭ بيىك تۇنگى شاڭعى تراسساسى رەتىندە ەندى (3200 م، تالعار اسۋى).
2. شىمبۇلاقتا جىلىنا 300 كۇن كۇن اشىق تۇرادى.
3. Gorilla Chimba Park – ورتالىق ازياداعى ەڭ بيىك سنوۋپارك (3200 م).
4. الماتى قالاسىنىڭ ورتالىعىنان «شىمبۇلاققا» 1 ساعاتتا عانا جەتۋگە بولادى.
5. Tenir – الەمدەگى ەڭ بيىك قوناقۇيلەردىڭ ءبىرى، ski-in فورماتىندا جۇمىس ىستەيدى.
6. كۋرورت الەمدىك دەڭگەيدەگى سپورتشىلاردى قابىلدايدى.
7. بوگدانوۆيچ مۇزدىعى، اياق جانە تيل شىڭدارى جاياۋ جەتۋگە بولاتىن جەردە ورنالاسقان (4000 م).
8. 1995 جىلدان بەرى شاڭعى ينسترۋكتورلارىنىڭ مەكتەبى جۇمىس ىستەيدى، 100-دەن استام سەرتيفيكاتتالعان نۇسقاۋشى بار.
9. كۋرورتتىڭ قىزمەتتەرى تۋرالى ارنايى پودكاستتار سەرياسى تۇسىرىلگەن.
10. دەمالىس ورنى حالىقارالىق سەرىكتەستىكتەرمەن جۇمىس ىستەيدى:
• ەۋرازيالىق تاۋ كۋرورتتارى اليانسىنىڭ باستاماشىسى.
• MONA Yong Pyong (وڭتۇستىك كورەيا)، روزا حۋتور (رەسەي)، شاحداگ (ءازىربايجان) كۋرورتتارىمەن ىنتىماقتاستىق.
• تۇركى ەلدەرىنىڭ تاۋ كۋرورتتارى وداعىن قۇرۋعا اتسالىستى.
ينفراقۇرىلىم جانە دامۋ جوسپارى
2024 جىلعى جاڭا مۇمكىندىكتەر:
• «پروفەسسور» تراسساسىنداعى كوتەرگىش – ورتا دەڭگەيلى شاڭعىشىلارعا ارنالعان.
• «بەلىي ميشكا» تراسساسىنداعى قار قارۋلارى – جاساندى قارمەن جابدىقتالىپ، ەرتەرەك اشىلادى.
• Le Mont مەيرامحانا-قوناقۇيى – 2850 م بيىكتىكتە پانورامالىق كورىنىستەرمەن.
• Shymbulak Medeu Camp گلەمپينگى – قىسقى دەمالىسقا ارنالعان ەرەكشە ورىن.
• جاڭا دارەتحانالار – 3200 م، ورتا جانە «مەدەۋ» بازالىق ستانسياسىندا جاڭارتىلدى.
• جارىقتاندىرۋدى جاڭارتۋ – تۇنگى شاڭعى تەبۋگە ىڭعايلى ەتىلدى.
شىمبۇلاق – حالىقارالىق دەڭگەيدەگى سپورتتىق جانە تۋريستىك ورتالىق رەتىندە دامۋىن جالعاستىرىپ كەلەدى.