2026 جىلعى 1 قاڭتاردان باستاپ قازاقستاندا جاڭا سالىق كودەكسى قولدانىسقا ەنگىزىلدى. سوعان سايكەس ارناۋلى سالىق رەجيمدەرىنىڭ سانى ۇشكە دەيىن قىسقارتىلدى. ق ر قارجى مينيسترلىگى مەملەكەتتىك كىرىستەر كوميتەتى كاسىپكەرلەرگە قانداي رەجيمدەر قاراستىرىلعانىن جانە قانداي جاعدايدا 2026 جىلعى 1 ناۋرىزعا دەيىن سالىق رەجيمىن تاڭداۋ تۋرالى حابارلاما بەرۋ قاجەت ەكەنىن ءتۇسىندىردى، دەپ حابارلادى Aqshamnews.kz.
جاڭا سالىق كودەكسىندە كەلەسى ءۇش ارناۋلى سالىق رەجيمى كوزدەلگەن: ءوزىن-وزى جۇمىسپەن قامتىعاندار ءۇشىن؛ وڭايلاتىلعان دەكلاراسيا نەگىزىندەگى رەجيم؛ شارۋا جانە فەرمەر قوجالىقتارى ءۇشىن.
«جاڭا سالىق كودەكسى اياسىندا ارناۋلى سالىق رەجيمدەرىنىڭ سانى قىسقارتىلدى، ياعني ولار ۇشكە دەيىن وڭتايلاندىرىلدى. بۇعان دەيىن ولاردىڭ سانى جەتى بولعان. قازىرگى تاڭدا ءۇش ارناۋلى سالىق رەجيمى قالدى. ءبىرىنشىسى – وڭايلاتىلعان دەكلاراسيا نەگىزىندەگى ارناۋلى سالىق رەجيمى. ەكىنشىسى – ءوزىن-وزى جۇمىسپەن قامتىعاندارعا ارنالعان ارناۋلى سالىق رەجيمى. ءۇشىنشىسى – شارۋا جانە فەرمەر قوجالىقتارىنا ارنالعان ارناۋلى سالىق رەجيمى»، - دەپ اتاپ ءوتتى ق ر قم مەملەكەتتىك كىرىستەر كوميتەتىنىڭ ارناۋلى سالىق رەجيمدەرىن اكىمشىلەندىرۋ باسقارماسىنىڭ باسشىسى ەرقانات شىڭبەرگەن.
كاسىپكەرلەر نەنى ءبىلۋى ءتيىس:
وڭايلاتىلعان دەكلاراسيا نەگىزىندەگى اسر
وسى رەجيمدى قولدانۋدى جوسپارلاپ وتىرعان سالىق تولەۋشىلەر 2026 جىلعى 1 ناۋرىزعا دەيىن قولدانىلاتىن سالىق سالۋ رەجيمى تۋرالى حابارلاما ۇسىنۋى قاجەت.
ەگەر كورسەتىلگەن مەرزىمدە حابارلاما ۇسىنىلماسا، سالىق تولەۋشىلەر 2026 جىلعى 1 قاڭتاردان باستاپ اۆتوماتتى تۇردە جالپىعا بىردەي بەلگىلەنگەن سالىق سالۋ تارتىبىنە اۋىستىرىلادى.
حابارلامانى:
- سالىق تولەۋشىنىڭ كابينەتى (اج ءسايج جۇيەسىندە «قۇجاتتاردى تاپسىرۋ» – «قولدانىلاتىن سالىق سالۋ رەجيمى تۋرالى حابارلاما» ءبولىمى).
- E-Salyq Business ارنايى ءموبيلدى قوسىمشاسى ارقىلى («قىزمەت» – «جك سالىق سالۋ رەجيمىن وزگەرتۋ» ءبولىمى).
- قاعاز نۇسقادا ورنالاسقان جەرى بويىنشا مكب ارقىلى؛
- بانكتەردىڭ ءموبيلدى قوسىمشالارى ارقىلى (قازىرگى ۋاقىتتا بۇل سەرۆيس Kaspi Bank قوسىمشاسىندا «مەملەكەتتىك قىزمەتتەر» – «جك رەكۆيزيتتەرى مەن سالىق رەجيمىن وزگەرتۋ» بولىمىندە ىسكە اسىرىلعان) بەرۋگە بولادى.
ءوزىن-وزى جۇمىسپەن قامتىعاندارعا ارنالعان ارناۋلى سالىق رەجيمىنە كوشۋ
2026 جىلعى 1 ناۋرىزدان باستاپ سالىق ورگاندارى 2025 جىلى پاتەنت نەگىزىندەگى اسر نەمەسە ارنايى ءموبيلدى قوسىمشاسى ارقىلى اسر قولدانعان سالىق تولەۋشىلەردى جك رەتىندە ەسەپتەن اۆتوماتتى تۇردە شىعارادى.
ەسەپتەن شىعارۋ كۇنى رەتىندە 2026 جىلعى 1 قاڭتار تانىلادى، بۇل رەتتە سالىق تولەۋشىنىڭ ەسەپتەن شىعۋ تۋرالى ءوتىنىشتى ءوز بەتىنشە بەرۋ قۇقىعى ساقتالادى.
ەگەر سالىق تولەۋشى قولدانىلاتىن سالىق سالۋ رەجيمى تۋرالى حابارلاما تاپسىرىپ، وزگە رەجيمدى تاڭداعان جاعدايدا، ەسەپتەن شىعارۋ جۇرگىزىلمەيدى. بۇل رەتتە ءوزىن-وزى جۇمىسپەن قامتىعاندارعا ارنالعان اسر قولدانا باستالعان كۇنى رەتىندە E-Salyq Business ءموبيلدى قوسىمشاسىندا العاشقى چەك قالىپتاستىرىلعان كۇننەن تانىلادى.
شارۋا جانە فەرمەر قوجالىقتارى ءۇشىن ارناۋلى سالىق رەجيمىنە كوشۋ
اتالعان رەجيمگە كوشۋ 2026 جىلعى 1 ناۋرىزعا دەيىن سالىق ورگاندارى ارقىلى اۆتوماتتى تۇردە جۇزەگە اسىرىلادى جانە حابارلاما تاپسىرۋدى تالاپ ەتپەيدى.
ەسكە سالا كەتەيىك، بۇعان دەيىن جاڭا سالىق كودەكسىندە قانداي وزگەرىستەر قاراستىرىلعانىن جازدىق.