مەملەكەت باسشىسىنىڭ جالپىعا بىردەي دەكلاراسيالاۋ تاسىلدەرىن قايتا قاراۋ تۋرالى تاپسىرماسىن ىسكە اسىرۋ ءۇشىن ەلىمىزدەن تىس اكتيۆتەرى بار ادامداردى قوسپاعاندا، ازاماتتاردىڭ وسى ساناتىن اكتيۆتەرى مەن مىندەتتەمەلەرى تۋرالى دەكلاراسيالاردى ۇسىنۋدان بوساتۋ ۇسىنىلىپ وتىر.
بۇعان مەملەكەتتىك ورگانداردىڭ دەرەكتەر بازاسىن سيفرلاندىرۋ، قولما-قول اقشاسىز تولەمدەردىڭ جوعارى ۇلەسى (86%)، اۆتوماتتاندىرىلعان سالىقتىق باقىلاۋ، حالىقارالىق كەلىسىمدەر شەڭبەرىندە قارجىلىق شوتتار بويىنشا دەرەكتەر الماسۋ، سونداي-اق سيفرلى قىزمەتتەردىڭ كەڭ قولجەتىمدىلىگى ىقپال ەتىپ وتىر.
قارجى مينيسترلىگى شەتەلدە اكتيۆتەرى بار تۇلعالارعا، سايلاۋعا تۇسۋگە قۇقىعى بار ازاماتتارعا، مەملەكەتتىك لاۋازىمعا ورنالاسۋعا جانە ولارعا تەڭەستىرىلگەن كانديداتتار ءۇشىن، سونداي-اق بانكتەردىڭ، باعالى قاعازدار نارىعىنىڭ، ساقتاندىرۋ ۇيىمدارىنىڭ ءىرى قاتىسۋشىلارى بولعىسى كەلەتىندەر ءۇشىن اكتيۆتەر مەن مىندەتتەمەلەر تۋرالى دەكلاراسيانى (250.00 سەن) ۇسىنۋ جونىندەگى مىندەتتى ساقتاۋدى ۇسىنىپ وتىر.
سونداي-اق ازاماتتارعا اكتيۆتەر مەن مىندەتتەمەلەر تۋرالى دەكلاراسيانى ءوز ەركىمەن ۇسىنۋ قۇقىعى بەرىلەتىنىن ايتا كەتەيىك.
بۇل رەتتە مەملەكەتتىك قىزمەتشىلەرگە، كۆازيمەملەكەتتىك جانە جەكە كومپانيالاردىڭ باسشىلارىنا، قۇرىلتايشىلارعا (ونىڭ ىشىندە 25% استام جانە ودان دا كوپ اكسيا يەلەنۋشىلەرگە)، ولاردىڭ جۇبايلارىنا، سونداي-اق قازاقستان رەسپۋبليكاسىنان تىس جەرلەردە اكتيۆتەرى بار جانە (نەمەسە) دەربەس سالىق سالىناتىن تابىس العان ادامدارعا كىرىستەرى مەن مۇلكى تۋرالى جىل سايىنعى دەكلاراسيانى (270.00 سەن) تاپسىرۋ جونىندەگى مىندەت ساقتالاتىنىن ايتا كەتۋ كەرەك.
قوسىمشا قۇنى 20 000 اەك (74 ملن تەڭگە) اساتىن ءىرى ساتىپالىم جاساعان تۇلعالار ءۇشىن وسىنداي مىندەتتى بەلگىلەۋ ۇسىنىلدى.
ەستەرىڭىزگە سالا كەتەيىك، كۇنى كەشە ەلىمىزدە ەل تۇرعىندارىنىڭ 90 %-ى كەلە جىلدان باستاپ دەكلاراسيا تاپسىرۋدان بوساتىلاتىنى تۋرالى جاريالانعان بولاتىن.