وتباسىلىق زورلىق-زومبىلىقتان قازا تاپقان سالتانات نۇكەنوۆانىڭ ەسىمى قازاقستاننىڭ ەلەۋلى تۇلعالارىنىڭ پانتەونىنا ەنگىزىلدى، - دەپ حابارلايدى Aqshamnews.kz
بۇل تۋرالى مارقۇمنىڭ اعاسى ايتبەك امانگەلدى حابارلاعان.
ايتبەكتىڭ ايتۋىنشا، ول اناسىمەن بىرگە قوستاناي وبلىسىنداعى «امانگەلدى» تاريحي-مەموريالدىق كەشەنىنە ارنايى بارعان. بۇل جەردە مەموريالدىق قابىرعا مەن ەل تاريحىنا ەلەۋلى ۇلەس قوسقان تۇلعالارعا ارنالعان پانتەون ورنالاسقان.
"وسى پانتەوندا قازاقستان تاريحىندا ءىز قالدىرعان تۇلعالاردىڭ قاتارىندا سالتاناتتىڭ اتى جازىلعان مەموريالدىق تاقتا ورناتىلدى. بۇعان دەيىن ءبىز پاۆلوداردان اكەلىنگەن توپىراقتى پانتەونعا تابىستاعان ەدىك، ول مەموريالدا كاپسۋلا تۇرىندە ساقتاۋلى. مۇندا سالتاناتتى ەل تاريحىنا اسەر ەتكەن تۇلعالاردىڭ قاتارىنا قوسىپتى"، – دەپ جازدى ايتبەك امانگەلدى الەۋمەتتىك جەلىدەگى جازباسىندا.
ەسكە سالا كەتسەك، 2023 جىلدىڭ 9 قاراشاسىنا قاراعان ءتۇنى سالتانات نۇكەنوۆا استاناداعى BAU مەيرامحاناسىندا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆتىڭ قولىنان قازا تاپقان ەدى. اۋىر سوققىعا جىعىلعان سالتانات كوز جۇمدى.
2024 جىلدىڭ 13 مامىرىندا استانادا وتكەن سوت پروسەسى بارىسىندا قۋاندىق بيشىمبايەۆ ءوز جۇبايىن ازاپتاپ ولتىرگەنى ءۇشىن كىنالى دەپ تانىلىپ، 24 جىلعا باس بوستاندىعىنان ايىرىلدى.
بۇل ءىس قازاقستان تاريحىنداعى ەڭ كوپ تالقىلانعان ىستەردىڭ ءبىرى بولدى. وعان بۇكىل ەل عانا ەمەس، شەتەلدىك ب ا ق تا نازار اۋداردى. قوعامدا ۇلكەن سەرپىلىس تۋىپ، الەۋمەتتىك جەلىلەردە سالتاناتتى قولداۋ اكسيالارى ءوتتى. وسى وقيعادان كەيىن تۇرمىستىق زورلىق-زومبىلىق ماسەلەسى بۇرىنعىدان دا وتكىر كوتەرىلە باستادى. ايەل قۇقىعىن قورعاۋشىلار، زاڭگەرلەر مەن بەلسەندىلەر زاڭنامانى كۇشەيتۋدى جانە وتباسىلىق زورلىق-زومبىلىققا قارسى ناقتى شارالار قابىلداۋدى تالاپ ەتتى.