ابايداعى ورتكە سالعىرتتىق تانىتقانداردىڭ ءبارى جاۋاپ بەرەدى.
باس پروكۋروردىڭ ورىنباسارى جاندوس ومىرالييەۆتىڭ ايتۋىنشا، يلين، سۇلەيمەنوۆا، ۇرانحايەۆ جانە احمەتوۆتەن جاۋاپ الىنادى، دەپ حابارلايدى Almaty-akshamy.kz
باس پروكۋروردىڭ ورىنباسارى قىلمىستىق كودەكستىڭ 292-بابىنىڭ 3-بولىگىمەن ( "ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان ءورت قاۋىپسىزدىگى تالاپتارىن بۇزۋ") قىلمىستىق ءىس قوزعالعانىن اتاپ ءوتتى. پرەزيدەنت بۇل ءىستى تەرگەۋدى باس پروكۋراتۋراعا تاپسىرعان. ۆەدومستۆونىڭ ارنايى قىزمەتى تەرگەۋدى باستاپ كەتتى، قۇرامىنا "بارلىق قۇقىق قورعاۋ ورگاندارىنىڭ ەڭ تاجىريبەلى، بىلىكتى تەرگەۋشىلەرى مەن جەدەل ۋاكىلدەرى" ەنگەن ۆەدومستۆوارالىق تەرگەۋ-جەدەل توبى قۇرىلدى. توپ وقيعا ورنىندا، ونى باس پروكۋروردىڭ ءبىر ورىنباسارى باسقارادى. ءىس باس پروكۋروردىڭ جەكە باقىلاۋىندا.
"سونىمەن بىرگە قورشاعان ورتاعا وراسان زور زيان كەلتىرگەن بۇل قايعىلى وقيعانىڭ اۋقىمىن، ەڭ نەگىزگىسى – 14 ورمان شارۋاشىلىعى قىزمەتكەرىنىڭ قىزمەتتىك مىندەتىن اتقارۋ كەزىندە قازا تابۋىن ەسكەرە وتىرىپ، ءبىز دە لاۋازىمدى تۇلعالاردىڭ سالعىرتتىعى بويىنشا قىلمىستىق ءىس قوزعادىق. ال ءقازىر بۇل ەكى ءىستى باس پروكۋراتۋرا تەرگەپ جاتىر. وسى قىلمىستىق ءىستى تەرگەۋ اياسىندا ءوز مىندەتتەرىنە ءاتۇستى، جاۋاپسىز قاراعان، سونىڭ سالدارىنان وزىنە جۇكتەلگەن مىندەتتى ورىنداماۋىنان قايعىلى جاعدايعا جانە ازاماتتارىمىزدىڭ قازا تابۋىنا اكەپ سوقتىرعان بارلىق لاۋازىمدى تۇلعا انىقتالادى"، - دەدى باس پروكۋروردىڭ ورىنباسارى.
بۇل رەتتە توتەنشە جاعدايلار مينيسترلىگىنىڭ ەكس-باسشىسى يۋريي يلين، ەكولوگيا جانە تابيعي رەسۋرستار ءمينيسترى زۋلفيا سۇلەيمەنوۆا، اباي وبلىسىنىڭ اكىمى نۇرلان ۇرانحايەۆ، شىعىس قازاقستان وبلىسىنىڭ اكىمى دانيال احمەتوۆ سىندى شەنەۋنىكتەردىڭ ارەكەتىنە ءالى ەشقانداي باعا بەرىلگەن جوق.
"ءبىراق وسى قىلمىستىق ءىس اياسىندا بارلىق قاتىسى بار تۇلعالار، لاۋازىمدى تۇلعالار، قىزمەتتىك مىندەتتەرىنە قاتىستى ءتيىستى شارالاردى قولدانباي، سونىڭ سالدارىنان اۋقىمدى ءورت پەن ادام ولىمىنە اكەپ سوقتىرعانداردىڭ ءبارى ءسوزسىز جاۋاپكەرشىلىككە تارتىلادى. ءقازىر شەنەۋنىكتەردىڭ ارەكەتى سارالانعان جوق، تەرگەۋ ەندى باستالدى. وسى قىلمىستىق ءىس اياسىندا جاۋاپقا تارتىلاتىن ادامداردىڭ كوبى، مۇندا تەك باسشى قىزمەتكەرلەر عانا ەمەس، ورتا بۋىن باسشىلارى دا بار، ولار ءقازىر ءورتتى سوندىرۋگە اتسالىسىپ جاتقانىن ەسكەردىك. ءبىزدىڭ باستى ماقساتىمىز – ءورتتى ءسوندىرۋ. سوندىقتان بۇل كۇندەرى ءبىز ولاردا الاڭداتپايمىز، ولاردان مىندەتتى تۇردە جاۋاپ الىنادى. تەرگەۋ مەرزىمى - ەكى اي"، دەدى جاندوس ومىرالييەۆ.
ول تەرگەۋشىلەردىڭ اباي وبلىسى بولىنگەنگە دەيىن توعىز جىل باسقارعان شىعىس قازاقستان وبلىسىنىڭ اكىمى دانيال احمەتوۆكە قوياتىن ساۋالى از ەكەنىن ايتتى.
"ول "سەمەي ورمانى" ورمان شارۋاشىلىعىن قاداعالامايدى، ول ەكولوگيا جانە تابيعي رەسۋرستار مينيسترلىگىنە قارايدى. سول كۇندەرى ىسكە قوسىلۋى كەرەك بولعان قارجىلاندىرۋ، ءتيىستى تەحنيكامەن قامتاماسىز ەتۋ، كادر ماسەلەسى، تانۋ جۇيەلەرىنىڭ بار-جوعى، ەسكەرتۋلەر جانە باسقا دا نورماتيۆتىك قۇقىقتىق اكتىلەر سياقتى ماسەلەلەر ەكولوگيا مينيسترلىگىنىڭ قۇزىرىندا. اكىمدىكتەر ماتەريالدىق-تەحنيكالىق بازانى قامتاماسىز ەتۋگە قاداعالامايدى جانە جاۋاپ بەرمەيدى. بىزدە ءقازىر بۇل فاكتىلەر بويىنشا سۇراق جوق (دانيال احمەتوۆكە – رەد.).تەرگەۋ ءجۇرىپ جاتىر"، دەدى ول.
ول ءقازىر باسقا دا تەرگەۋ ارەكەتتەرىنە قوسا، جەدەل-ىزدەستىرۋ سيپاتىنداعى ارەكەتتەر دە جۇرگىزىلىپ جاتقانىن اتاپ ءوتتى. جۋرناليستەردىڭ "بىرەۋ-مىرەۋى قاشىپ كەتكەن جوق پا؟" دەگەن سۇراعىنا:
"جوق، جوق، مۇنى جاسىرىن تەرگەۋ ارەكەتتەرى دەۋگە بولادى. شەنەۋنىكتەردەن جاۋاپ الماس بۇرىن، ءبىز باسقا جايتتاردى انىقتاپ، ءبىرقاتارىن ناقتىلاۋىمىز كەرەك، باسقا دا باعىنىشتى تۇلعالاردان جاۋاپ الۋىمىز كەرەك. وسىدان كەيىن سۇراقتاردىڭ تولىق كولەمى جينالعان كەزدە، ءبىز تەرگەۋگە قاجەت بارلىق ادامنان ءسوزسىز جاۋاپ الامىز"، - دەپ جاۋاپ بەردى.