دەپۋتات داۋلەت مۇقايەۆ ءماجىلىستىڭ جالپى وتىرىسىندا ۇلتتىق قوردان 18 جاسقا دەيىنگى بالالارعا بەرىلەتىن تولەمگە قاتىستى مەملەكەتتىك ورگاندار وكىلدەرىنە سۇراق قويدى، دەپ حابارلايدى Almaty-akshamy.kz Azattyq Ruhy-نا سىلتەمە جاساپ.
«مىسالى، ۇيدە اعايىندى بالالار بولادى. ءقازىر ۇلكەنى 17 جاستا دەلىك. وسى ۇلتتىق قوردان بەرىلەتىن 3 500 دوللاردى 18 جىلعا ەسەپتەگەندە ولار ءار جىل سايىن شامامەن 200 دوللار عانا الادى. 200 دوللار نە بىلىمگە، نە ۇيگە جەتپەيدى. وسىدان مىناداي سۇراق تۋىندايدى: ءوزىنىڭ ارتىنان ەرىپ كەلە جاتقان باۋىر، قارىنداس، ىنىلەرىنە اقشانى بەرۋ، اۋدارۋ مۇمكىندىگى بار ما؟ ەگەر بولماسا، نەگە وسى ماسەلەنى قاراستىرماسقا؟»،– دەپ سۇرادى دەپۋتات قارجى مينيسترلىگى وكىلىنەن.
ءوز كەزەگىندە قارجى ۆيسە-مينيسترى داۋرەن تەمىربەكوۆ دەپۋتاتتىڭ سۇراعىنا جاۋاپ بەردى.
«ءبىز بۇل سۇراقتى دا تالقىلادىق. ەگەر ءبىر وتباسىندا 18 جاسقا تولماعان بىرنەشە بالا وسى اقشانى الاتىن بولسا، ولاردىڭ قۇقىعى وتباسى بانكىنە اۋدارىلادى. وتباسى بانك دەپوزيت ارقىلى مىسالى، 3-4 بالانىڭ دەپوزيتىن بىرىكتىرىپ، ءتيىستى ءبىر ماقساتقا جۇمساي الادى. ماقسات ءبىر – ول پاتەر الۋ. ونداي مۇمكىندىك قاراستىرىلعان»، - دەپ جاۋاپ بەردى ۆيسە-مينيستر ماجىلىستە.
سونىمەن قاتار، زاڭدى تانىستىرعان دەپۋتات ءۇنزيلا شاپاق تا سۇراقتىڭ جاۋابىن تولىقتىرا كەتتى.
«ول اقشا 10 جىلعا دەيىن بجزق ساقتالادى. سەبەبى، ول بالالاردىڭ ءبارى ءبىر جىلدا 18 جاسقا تولمايدى. سول سەبەپتى وزىنەن كەيىنگى باۋىرلارىنىڭ جاسى 18 جاسقا تولعان ساتتە عانا ول اقشا قوسىلادى. وسىعان دەيىن قولدانىلعان زەينەتاقى قورىنان اقشا الۋ مەحانيزمىمەن بىردەي بولادى. بۇل زاڭدا بار»، - دەدى دەپۋتات.
ەسكە سالا كەتەيىك، بۇگىن دەپۋتاتتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسىنىڭ ۇلتتىق قورىنان بالالارعا تولەم جاساۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭنىڭ جوباسىن ءبىرىنشى وقىلىمدا ماقۇلدادى.